【独家】婚后只顾家庭忽略自己康子妮认清自我最终离婚

2021-06-01 21:06

44岁的康子妮（Lily）最近首次拍摄真人骚《中女唔易做》，节目中挑战做米线店服务员，结果因压力搞到爆喊，令她更明白劳动阶层辛酸。不过她完全唔介意做中女，反而好享受更有自我价值的自己，因02年跟林晓峰结婚后，只识照顾家庭而忽略自己需要，她承认最终离婚展开新生活，跟更了解自己有关。撰文：杜淑霞摄影：谭壹致服装：YLY studio

Lily笑言18岁做售货员已被误当30多岁，做中女完全唔介意，但曾经介意过演妈咪角色，「有人叫我拍剧做锺嘉欣阿妈，我啱啱生完个大仔就做锺嘉欣阿妈！？咁快！我哋差唔多大喎！到今时今日冇乜所谓，都豁咗出去。（𠵱家搵你？)咁够胆好嘢！我即刻做呀！」

做服务员感受深

Lily好享受中女阶段更加了解自己，更因而有了离婚决定，「两年前度，做郑伊健个巡回骚，收工同啲乐手去饮嘢，喺pub人哋问我饮咩？我停咗几秒都答唔到，想答橙汁又惊好娘，我真系唔知自己想饮乜，嗰吓我醒一醒，咁简单问题谂咁耐，同埋系冇答案㗎！于是我开始发掘多啲自己，同自己倾多啲偈。（婚姻都因为咁样有改变，清楚自己想要啲咩？）当然系有影响啦！每个阶段同每个经历都会产生啲嘢令我去谂。如果唔系演唱会有番小小生机，我叠埋心水系咁就一世，冇谂过自己可以再创造啲咩嘢，家庭系好重要，但其实你冇咗自己。」

拍《中女》做「谭仔姐姐」，令Lily感受好深，「有个客不停话我落错单，搞到店长出嚟帮我解围，平息唔到佢嬲怒，我就坐埋一边喊，好内疚惊返一日工搞到佢哋冇生意，教我嘢嘅姐姐走埋嚟安慰我，叫我要放松，嗰吓觉得我读咁多书，竟然控制唔到个情况，芝麻绿豆嘅事睇到咁大，反而姐姐冇我咁高学历睇嘢咁濶，我好佩服佢。佢哋受压程度唔会比我哋低，好似手板把眼见工作，其实好多嘢要兼顾，自己之前好自大，今次系个好好经验，所有劳动阶层承受好多压力，我𠵱家明白多啲，入到餐厅会体谅多咗。」