【独家】《调教你MIRROR》入Camp前虚构环节瞒花姐 梁祖尧 Tiger误解姜涛唔睬人

无论系唔系镜粉，MIRROR早前在演唱会脱胎换骨表现外界有目共睹，12位成员都异口同声话全赖拍了梁祖尧的《调教你MIRROR》，令他们变得更加团结，间接令演唱会更吸引。祖祖自爆开头度桥时，用虚构环节连花姐都瞒埋，而一班仔仔亦抱住零信任入camp，不过《调教》时个个喊到猪头，祖祖就话冇乜神奇妙法，只系一班朋友饮住酒倾心事就嚟料。不过他要求队中最唔熟的姜涛和Tiger每次见面都要倾偈确实有效，Tiger认为跟姜涛关系有改进，祖祖笑指他对姜涛亦有改观，他们以往以为姜涛嬲了成村人好cool，原来认识后发觉反差好大。撰文：杜淑霞 摄影：谭壹致 造型：PIPA Creative 服装：COMME des GARÇONS @ I.T、[email protected]、HBX、Kenzo、i.t、BEAMS、Christian Louboutin(MIRROR)

祖祖表示决定开《调教你MIRROR》时唯一要求是全部要玩真，「《调教》宗旨系要一个真嘅真人骚，唔可以有任何嘢系夹，夹我系唔做嘅，所有嘢都系要真实发生，花姐佢哋又肯将呢件事真实发生喎！甚至乎好迟先知我哋去边度拍，花姐开会有嚟问『其实件事会做啲咩』（Stanley：其实佢哋开会系假。）最后尾嗰次开会系特登为花姐，差唔多出发前3、4日，嗰啲同花姐讲嘅嘢系假㗎！（瞒埋佢？）瞒埋！其实都度紧，度咗头3、4日，会画吓画、追吓牛、摄吓影咁，全部嘢都假，因为花姐个工作系保护佢哋，我哋又唔可以令到花姐失职，唯有要令到佢唔知情，佢先放心。」



「调教」过程中MIRROR成员个个喊到猪头，祖祖话冇妙法专登令12子喊，「我哋唔系做啲戒酒治疗，喊完畀掌声！我谂系互相信任，有时如果你当咗自己系导师，就同佢哋高高在上有差别，但其实大家都系做朋友啫，讲真我去酒吧都会对住啲朋友成日喊，我冇咩秘诀，你真心对人人哋真心对番你。」Jer说：「阿祖佢唔系真系教我哋一啲演技上面嘅嘢，（祖：根本冇教过，其实我哋成日饮酒之嘛！）佢教我哋好赤裸去表现自己，如果作为一个表演者，你喺舞台将你最赤裸嘅自己摆上嚟，冇话好真实技巧，纯粹每个人最真嘅自己放出嚟。」Stanley补充：「同埋阿祖系有啲灵异体质，佢系好sensitive，知道你未系好真讲出嚟，仲有啲嘢block住咗，有啲说话可能抑压咗我哋心底好耐，当一释放情绪就会好决堤。」不过讲到信任原来最初MIRROR对祖祖和制作组完全零信任，「第一次见面我哋喺酒吧度一齐饮嘢，佢哋个个喺度摸吓啲枱底睇吓有冇啲机关，啲啤酒又闻吓系咪尿呀！（Jer：以《Mirror Go》嘅情况嚟讲，系要沟啲辣椒酱，唔会咁顺摊）用咗4日先至令佢哋真系相信畀佢哋嚟放假。（Alton：你仲做戏，你哋仲扮嘢，哈哈！你谂吓佢一个人畀12个人唔相信个压力系好大，哈哈！）我哋冇谂过《Mirror Go》对于佢哋个烙印系咁大。」

排舞更快手


讲到入camp前后跟队友关系转变，Tiger觉得同姜涛最明显，在camp时祖祖要他们「每次倾五十句偈」仲有keep住做，「不过发觉同我想像中嘅佢冇乜分别，哈哈！只系倾偈，但我接受咗呢个人，佢都接受咗我，原来佢锺意运动睇戏，佢睇好多戏，你唔倾偈唔会知。（以前做一日嘢系咪一句嘢都冇讲？）冇㗎！（祖祖：招呼都会打啩？）招呼都唔打，你知佢成日带住耳机，好似嬲咗成村人咁。」祖祖都认同，间中在化妆间碰面的姜涛好cool，「佢有种气场系你唔好搞我，𠵱家知道佢应该系好肚饿，因为佢做嘢之前系唔食嘢，我肚饿都系咁样，入到camp认识真正嘅佢，呢条友低能㗎喎！原来低能都唔足以形容佢，佢系一个比细路仔更加细路仔嘅人，其实呢个反差点都系我自己偏见，我都冇尝试过佢去了解佢。」



Stanley认为入camp令整队MIRROR关系改变更大，「演唱会嗰时我哋更加肯定好彩有呢个camp，令我哋更加团结，如果冇咗呢件事个骚唔会咁好睇罗！我觉得系一直冇一个地方、时间、人物去令到我哋12个一齐沟通，导致到一啲现实出现，误会加深，又磨灭咗团魂，大家根本就冇嘢。（有冇闹交？）我哋唔会对住咁闹，𠵱家有个机会畀我哋坐低沟通件事，咁少事就冇嘢啦！」Jeremy更举例指排舞变快，「我哋有时排舞，譬如有动作唔齐，我会唔够胆讲嘅，但系我明明见到个问题，会唔够胆讲，好似会hurt到佢，好多事咁我又唔系队长，好似应该系队长做或者跳舞叻嗰班人做，入完个camp之后我会直接话呢度大家一齐执执佢，大家为件事好，唔会惊产生咩误会，所以我可以直接讲。」