【独家】未适应圈中生活感迷失曾乐彤受压狂搲头甩发

2021-06-14 11:56

曾乐彤最近推出EP《Inner Child》辑录这两年制作歌曲，她认为第二张唱片以成长做主题好适合。不过，她坦言仲未适应圈中生活，感觉不踏实好迷失，又给自己不少压力，更自爆继不自觉搲耳仔搞到损晒后，现在狂搲头严重到搲损头皮劲甩头发，她也担心是情绪问题，但未打算睇医生，只会搵方法减压。撰文：杜淑霞摄影：张咏森发型：Zap Tang 场地：Coffeelin

继18年推出首张EP《#meme》后，曾乐彤刚推出《Inner Child》，她认为相当适合，「第1年出碟系新人嘅作品集咁，𠵱家入行3年几，好似将啲歌又可以出一只碟，咁啱睇番个歌list又真系几啱成长为课题去做一件事。」她承认由学校跳入社会，还未适应这个成人世界，「唔会知自己几时系尽咗力，永远比你勤力嘅人大有人在，当我入咗社会觉得嗰个无力感系超大嘅，运气之馀仲有大环境，好多嘢都唔可以估计到嘅时候，呢啲就要靠你执生能力，但呢啲系你读书都读唔到。」

有伤口未敢染发

正因为这份无力感，入行3年多的曾乐彤未敢有太多目标，因自觉已给了自己太多无形压力，更出现狂搲头甩头发情况，「真系甩头发，经理人唔畀我搲头发，因为本身搲耳仔先，搲到耳窝个位长期发炎，发型师唔畀我搲，我𠵱家完全冇事，因为我转咗搲头。我又唔系湿疹，纯粹系一个习惯，系会搲到流晒血。我㩒电话经常性系咁，半夜喺厕所搲咗半个钟九个字，搲到直情有声，自己都觉得好过份。（鬼剃头？）touch wood我未去到咁，我唔搲就唔会甩（头发），我好锺意搲到有头皮甩，所以都唔可以染头发，有伤口惊会入咗血。我都喺度谂自己有咩压力！？我系惊唱歌，惊我pick up得唔够快，好多嘢都冇乜信心，知道太紧张会坏事，以为说服到自己由佢啦！但其实我冇由佢罗！但可能（搲头）只系坏习惯，或者改番搲番耳仔，哈哈！（去做心理谘询？）我觉得好贵呀！自己对住块镜都识同自己倾偈，我觉得近啲开心啲人就得。」