【独家】亡妻离世1年　父女扶持走出阴霾　黄日华做「跟得老窦」陪女行街

自从爱妻梁洁华于去年5月因病离世后，黄日华（华哥）与女儿黄芷晴便一直相依为命，除了闲时踢波及跟周润发（发哥）跑山外，他早前又与囡囡一齐学整香薰蜡烛，并成功取得导师证书。屋企剩番两个人，华哥也特别珍惜父女相处时光，父亲节前，二人被《头条日报》记者撞到于沙田新城市广场买嘢食，之后「廿四孝爹哋」华哥仲好有耐性，全程静静地陪住芷晴拣衫。采访：谭壹致

上月初踏入31岁的黄芷晴，早前向传媒透露恨识男朋友，惜至今仍未有追求者埋身，又难怪她会单身嘅，事关除了忙于摆档卖自家饰物外，近来芷晴都一尽孝顺女责任，成日陪伴喺爸爸黄日华身边，似乎都冇乜机会Date吓异性。日前晚上近9点，一身运动Look的华哥孭住两大袋DECATHLON战利品，与戴上帽、穿连身白恤衫的芷晴现身一田扫零食，59岁依旧大大只的华哥负责推住架车仔，囡囡就专心执薯片，虽然爸爸行得有啲快，但两人都算合拍。

跟实囡囡
畀完钱，芷晴即帮手拎晒两大袋嘢食，不过一出门口见到啲蛋糕、饼乾，为食的她又停低手指指，之后仲行埋入铺慢慢睇，华哥就默默跟喺囡囡身后陪逛。结果兜咗一圈都睇唔啱，二人便上3楼GU睇衫，芷晴主攻连身裙，华哥继续毫无怨言做「跟得老窦」，最后芷晴又入手一条黑色恤衫长裙。满载而归的黄氏两父女，双双落停车场会合一名友人取车，临上车前，华哥先饮啖茶再叹番支烟才离开，睇嚟陪个女行咗成晚好攰吓喎！