【独家】投资6位数母女档开音乐会 刘雅丽唔怕蚀钱最多白做

疫情缓和，刘雅丽(Alice)急不及待同妈妈包晓华于8月3日假文化中心举行一场《我和妈妈有个约会》音乐会，今次Alice全资6位数字做老细，兼一脚踼做埋监制，笑言出钱又出力去捧红74岁嘅索妈妈：「捧红咗佢，我咪可以退休罗！趁佢仲咁索，又唱得，sell温情嘅母女档音乐会唔多，应该有market喎！」采访：方骞平 摄影：梁志明

日前刘雅丽妈妈晓华姐到狗公园放狗，带住14岁来福慢跑，顺道为8月音乐会备战练吓气。今次演出对晓华姐嚟讲有啲难度：「佢话捧红我，畀多啲歌我唱，到时要唱成20首歌，死啦！年纪大，背唔到咁多。」刘雅丽则说：「我拍住佢唱，我压力都大㗎！我成日话我做唔到青出于蓝，其实锺意做音乐剧，都系自细受妈妈影响。」

虽然演出场数只批到一晚，而且入场观众得七成半，有啲失预算，但刘雅丽冇工开年几，都唔想再无了期等落去，开住一场试水温先，反应好就系9月移师其他场地开part 2。自资6位数的刘雅丽唔担心损手离场：「计过数，最差都系白做冇人工，因为我哋第一次搞show，好多朋友都会买飞撑场，昔日演艺学院同学王祖蓝买20张，刘德华好锡我妈咪，就算唔喺香港都会买飞撑场。」刘雅丽爸爸系生意人，跟华哥及发哥有渊源，发哥系刘爸爸契仔，经他介绍识埋华仔，当年华仔想喺广播道租屋独居，搵刘爸爸帮手搵租盘，刘爸爸建议他买楼，仲叫发仔带埋华仔去登台搵首期，最终做成业主。晓华姐大赞华仔有情有义：「有段日子冇同华仔联络20年，点知我哋因为楼宇转按问题，要10几万嚟应急，华仔即帮手，上次佢开演唱会，都有帮我哋扑咗30张飞，仲喺第6行㗎。」