【倾完有改进】「遮遮」玩字母早餐 张敬轩求高人指点有咩意思

「早餐KOL」张敬轩自从因「遮遮」煲燶煲而嬲爆竹后，有一段时间甚少再分享的早餐，有网民担心「遮遮」地位随时不保，但实情轩仔只不过忙于「搬屋搬厂搬写字楼」，直到今日终于分享「遮遮」的杰作，轩仔留言：「佢开始玩字母添喇佢！」

轩仔贴了一张早餐相，相中只有三块类似英文字母B字的多士、一樽果酱和一杯黑咖啡后留言：「#到咗依家出街都仲有人问我今日食咩早餐，你哋唔使再问了，因为冇变过唔该！」轩仔表示为期两个月的搬屋搬厂搬写字楼终于到岸，基本上所有事都是新开始的时候，唯一没有变的就是早餐：「噚日朝头早起身，雪柜除咗两只冻嘅芒果同一个由旧屋带到嚟新屋已经雪咗两个礼拜嘅蜜瓜同埋啲汽水同冰格有冰粒，就乜都冇了... 我嗰下系着着哋，于是我将长久以来积压嘅各种问题，趁住今次转环境同佢好好讨论咗一番 #我突然间发现我嬲嘅时候英文会流利好多 #可能平时惯咗嘻嘻哈哈好明显佢唔系咁接受到我嘅认真mode #佢有啲唔开心」

轩仔表示「遮遮」会好好处理早餐问题并会想办法改进：「于是今朝就改进左#而我appreciate#其实有冇高人指点下个BBB组合系咪有咩意思#唔通系咩密码？#BreadBreadBread#我确系淆#早餐终于有得拣之 #张宅早晨全餐ABC#A餐 A形面包#B餐 B形面包#C餐 C形面包#阿遮心谂阿蛇你再叽叽趷趷我就俾C你食」有网民笑言「佢到底… 改进咗啲咩？」还有人说BBB是代表：「Bad Boy Breakfast」，但亦有人留言是「遮遮」的辞职信，意思是：「BYE BYE BOSS！」