【独家】义卖活动同小朋友合作冇难度 刘佩玥畀细佬爬头唔急嫁

刘佩玥（Moon）日前为「麦当劳叔叔之家慈善基金」义卖活动拍摄宣传片，跟9岁罕见血癌康复小朋友朗朗一齐合作，她笑指自己是大细路，所以跟小朋友相处特别投契，而且朗朗记稿比她更叻。讲到早前胞弟爬头结婚，她自言未心急嫁人，又话弟妇人品极好放心交细佬给她，更笑言可继承她去恰细佬。撰文：杜淑霞 摄影：谭壹致

今次是Moon跟该善团首度合作，不过好有渊源，「我细个已经知道呢个机构，好想参与去做义工，但系一直未有机会，其实我爸爸妈妈已经系呢个机构嘅义工嚟，佢哋邀请我嘅时候我即刻say yes，觉得好荣幸同好开心，因为我知道呢个机构帮到好多小朋友，亦都帮到佢哋嘅家庭，好有意义。」

自认大细路


讲到跟朗朗小朋友合作，Moon大赞对方表现出色，「佢好乖又好活泼好精灵，同埋佢记稿好犀利，佢唔系我拍档，佢系我帮手，好多嘢佢直情好似做demo咁，我哋稿入面系冇，但佢做晒出嚟好帮到我手。佢好坚强又好孝顺，头先分享时，佢话专登学首歌去打鼓畀爸爸听，喺父亲节时送畀爸爸，佢爸爸喺朗朗有病期间，专登辞咗份工去照顾佢，真系好伟大，而小朋友亦好懂事去锡番爸爸，令我好感动。（见你同小朋友相处好叻？）我平时同小朋友都真系相处得几唔错，可能同一个level同channel，同佢哋会好啱倾，我系个好玩得嘅姐姐，本身都系个大细路。」



提到早前胞弟爬头结婚，Moon冇唔舍得，仲大赞弟妇人品好好可继承衣钵，「佢喺教堂讲感词，话你哋唔会冇咗个仔唔会冇咗个细佬，反而系多个女同多咗妹，我听到即刻爆喊，我呢个弟妇真系冇得挑剔，真系好乖，一家人都好锡佢，最紧要系佢可以承继我衣钵去继续虾我细佬，哈哈！」追问下月生日32岁的她父母有冇催婚，她却赖父母不想她嫁，「我爸爸妈妈系唔系好想我嫁嗰只feel，从来冇问过我啲男朋友，唔系好Care，我留得喺屋企几耐得几耐，最好就唔好出街。我自己就冇乜计划或者planning，感情嘢、结唔结婚随缘啦！本身我谂住25岁结婚，屈指一算都过咗好几年，𠵱家唔谂专注工作。」