【独家】AL陈柏宇阮兆祥跟佢学唱歌 30岁Guddy教Edan撇甩乡音

歌手就算几有天份，有时都要靠背后高人帮手，先可以好好发挥，令到大家听到靓歌。《头条日报》就发现近年乐坛有个急速冒起歌唱老师Guddy（陈杰龙），虽然年纪轻轻只得30岁，但学生由出名唱得的阮兆祥、罗敏庄、小肥和陈柏宇，到当时得令的MIRROR成员Anson Lo（AL）、Edan、Stanley同Jeremy等等。Guddy能够被歌手热捧，背后音乐实力有几劲呢？Guddy又点品评呢班歌手学生唱歌水平呢？想知《头条》就为大家搵答案啦！撰文：杜杜　摄影：梁志明

Guddy曾在中文大学音乐系修读声乐，遇上启蒙老师叶葆菁后，发觉音乐巿场好濶，除了古典乐外，流行曲和冇伴奏合唱等对声音需求都好大，于是连流行曲和舞台剧唱法都去学。他大学毕业后当了两年中学老师，「家长见到我教合唱团，出面又有表演，开始搵我教小朋友，就系嗰两年开始萌生教唱歌念头。」他毅然辞职，教了一年playgroup储钱再到美国修读很流行的音乐课程「Speech Level Singing」，完成后返港正式开展教学工作。不过最初未有娱乐圈学生，直到同届大学同学、指挥家刘卓熙介绍了歌手秦馨敏（Emily），「期间佢声音有转变，佢同时喺陈辉阳个女声合唱团，跟住一个掕一个到小肥，就变到咁多啦！」


小肥唱歌感情真摰


小肥是Guddy教的首个有知名度歌手，他大赞小肥唱歌感情真摰，不会只顾技巧，「佢声质好大份，能够用力量去弥补高音域嗰啲问题，而且佢假声好响，但点样用真声继续上去，令到发音可以好正常同稳定就需要多啲时间，好似大只佬去跳芭蕾舞，拉筋要好长时间。」


陈柏宇最勤力学生


陈柏宇每周至少上一次Guddy堂，而且好有要求及独特见解，「佢发觉有啲歌嘅音域好难到达，或者声质唔满意就问我点解，佢好多谂法亦会问到好细。佢高音上嘅问题源自喉头位置，好影响发声健康，可能唱少少好容易会攰，或者冇咗某啲音域。初头不断练佢都有啲唔惯，但好开心，佢话呢几次Live开始觉得身体上有啲唔同。」


铁嗓子罗敏庄

罗敏庄因为音乐剧《我们的音乐》而搵Guddy教，「当中有首歌叫《大海歌》超出咗佢音域，佢一直以为自己属于好低音，其实佢唔系咁低仲有好多音域冇试。佢从来冇练过啲肌肉，练咗之后佢话『唱到《领悟》好多高音好正』，佢好有天分，畀样嘢佢练好快见效，所以我叫佢铁嗓子，因为冇乜嘢唱唔到。」

阮兆祥想搣甩80年代腔

阮兆祥是Guddy唱歌经验最丰富学生，「佢想打破一啲固有唱歌习惯，佢唔想尾音好似好80年代，我解释畀佢听唔系净系尾音，系成个声音嘅本质，你能唔能够驾驭以前未试过嘅音域，张惠妹系个好例子，佢唱歌方法冇变，只系咬字放嘅声音喺一定美感上转变，佢听到就明白。」

AL有powerful低音


Guddy由AL《WARRIOR》开始帮手，发现AL未被发掘的优点是低音，「佢有一把好靓嘅低音，只不过无可能一首跳舞嘅歌一粒高音都冇，所以要迫去唱一啲佢音域上难少少嘅曲目，唔系唱唔到，系要长时间令佢稳定。我期待佢呢个咁靓嘅低音将来点样发挥，唔知佢有咩火花发出嚟，佢把声成熟得嚟好有感染，香港歌手好少有，加埋中音可以好powerful！」


Edan乡音累事


Guddy眼中Edan有才华亦是个谦卑用心好学生，「你讲嘅嘢佢会认真咁思考去练，录《E先生》时我未教佢，佢Live唱呢首歌觉得唔系好顺，我哋练习就唱到，不过咬字真系呢！哈哈！佢第三声会变第六声，同埋啲入声，咬字绝对影响发声系统，引致好多鼻音问题，喉头又高，道气用唔到塞住咗，高音又唔到，骨牌咁样去。佢仲要自弹自唱，佢要驾驭一样嘢，但系又要投入个样要有表情，但系又有乡音，全部jam埋一齐。」


Stanley靓声好厚好man
Stanley由参加《造星》开始大家觉得他唱唔到歌，但Guddy完全反对，「佢把声好靓，佢把中高男声好厚好man，现役歌手好少，个个都飙高音，佢唔系冇高音，只系唔会飘咗上去，佢又唔系对音乐冇睇法，佢需要继续强健声带肌肉，亦需要去学点样用一个唔嗌嘅情况上到高音，搵到最舒服最好听嘅音域。」


Jeremy要改坏习惯


Guddy认为Jeremy声音肌理上面有坏习惯，又锺意狂爆高音，「佢系浑圆嘅声，一直以嚟专注高音发展，冇谂过中低音巩固咗，高音会更好，同埋会搵到自己最靓嘅音域。佢呢排稳定啲上堂嘅时候声音真系圆番，我觉得大家可以拭目以待，佢啱Rock
and Roll嘅嘢，快歌会做得好。」