IG Follower升逾39万 张家朗隔离做运动获网民大赞腿好长

为香港在东奥夺金的香港花剑代表张家朗现正于深圳接受隔离，隔离生活唔易过，日前佢就同吴诺弘、大师兄张小伦及队友崔浩然一齐开Live，最高峰有1.9万人收睇，劲有号召力。

师兄弟在Live中互相爆料，大师兄张小伦率先爆张家朗昵称叫「Jer Jer 」，大家问有咩特别意思，张家朗好似小朋友咁，即变高音答：「咩呀﹗因为我姓张之嘛，冇其他意思﹗」而直认单身的张家朗被队友踢爆7大择偶条件，直播约一个钟，有爆料有笑料，娱乐性十足，被网民激赞精彩过明星开直播。

隔离最好就系做运动，IG Followers逾39万的张家朗寻日就Po咗段运动片到IG，Caption系「Quarantine work out!」段快镜运动片见到张家朗系咁跳，又用一个按摩滚筒去辘对脚同脚板，但好笑嘅系，段片除咗见佢做运动，仲见埋佢唞紧嘅时候，佢话「唔好问我点解放松仲长过work out!」Hashtag #因为我以为自己禁咗录影嗰个掣 #点知冇，其实唔太明佢讲乜，事旦啦，睇到张家朗就可以，学网民留言话斋「条腿好长」，冇错，见对脚「发发吓」相当好睇。