【独家】下年结婚行街倾偈冇停过 王曼喜甜笑望女友绕到实

去年9月，王敏德大女王曼喜（Kayla）宣布与拍拖一年多的摄影师女友Elaine Chen订婚，婚礼暂定下年9月喺美国举行，王敏德仲话一谂起个女就快嫁人就唔舍得到想喊。虽然下年先行礼，但Kayla同另一半目前身处美国加洲叹世界，见佢除晒口罩四围去玩，睇见就爽嘞。采访:梁志明

Kayla于14年已坦承「出柜」，王敏德同马诗慧(Janet Ma)亦冇反对，女友Elaine仲好快融入家中，睇Janet Ma嘅IG有好多大合照，Elaine都有同场，场面好温馨。补充返少少资料，Elaine身世显赫，系恒隆地产创辨人之一陈曾焘嘅外孙女。

倾到唔识停
Kayla同Elaine去美国前，《头条日报》记者就见到呢Pair准新人去咗太古广场行街街，两人冇特别亲昵举动，但好好倾，程度系冇停过，全程互望，你问一句佢答一句，你讲完轮到佢讲，难怪要结婚。两人先去万宁买水，Kayla好口渴，一畀咗钱就除口罩即饮，然后再绕住Elaine手行，再倾住偈行去时装店，睇Kayla甜笑望住Elaine嚟行，睇路呀。喺时间店行咗半个钟，Elaine走嗰阵拎住个品牌纸袋，然后两人再上落扶手电梯行去停车场，准新人贴住行系咁倾，有冇咁多嘢讲呀?