【独家】Dusty Bottle拆夥女主音单飞 Kerryta狂野形象惹「收兵」传闻

2021-08-13 23:30

环球唱片曾力捧的5人乐队Dusty Bottle于去年11月以私人理由宣布解散。唱片公司睇中女主音Kerryta拥有一把磁性声音，仲好唱得，加埋41寸长腿，安排单飞再出道，推出首支个人作品《心野》，以神秘野性姿态再玩过。采访：方骞平摄影：梁志明场地：Mi Fit Studio@上环德辅道中

Kerryta虽然有得留低，但都要适应期：「因为今次系首次solo出歌，仲换晒制作班底，对我嚟讲系一个新尝试。以前我较依赖班兄弟，尤其我讲嘢唔叻，做访问时我讲得唔好，靠佢哋嚟搭够，𠵱家就要独力承受！呢个都系学习嘅过程嚟。即使分开咗，今次出歌佢哋都有畀意见，话锺意我首歌。」她承认，跟作战两年多嘅队友建立咗感情，决定分开会唔开心，亦曾担心前路，但做人要勇于生存，好彩最后唱片公司都支持她Solo。

觉得叶巧琳好Sexy
提到新歌歌词内容以女性角度出发，对于「女追男」，Kerryta坦承会主动出击，却否认如传闻中爱「收兵」：「谣言止于智者，证明公司成功打造到我喺《心野》MV入面嘅狂野形象，呢方面我身边朋友都好明白，男朋友更加安慰返我。」MV中她和男主角有肌肤之亲，感觉上带有挑逗性：「我怕尴尬，同导演商讨，头发以上唔可以掂。」Kerryta赞自己锁骨位最性感，突显咗平日有做运动嘅女人线条美，而她眼中《全民造星III》叶巧琳（Mischa）有性感美，另外，Kerryta想走多元化歌路。