【独家】感激老师廖启智一手带入行 黄定谦望领奖答谢两位「父亲」

作为新晋演员黄定谦（Himmy）机会算是不少，电影、电视广告都有试过，又跟不少有份量演员合作，譬如电影《沦落人》有影帝黄秋生演父亲。机会不绝故然幸福，不过遇上人生中伯乐令他跟戏剧结下不解缘，更加是难能可贵，可惜这个他视如父亲的戏剧导师廖启智已离他已去，幸好还有一直默默支持的亲生父亲，他最希望有朝一日能上台领奖，好好答谢这两位「父亲」。撰文：杜淑霞 摄影：谭壹致 发型：Oscar Ngan @ii ALCHEMY hair 场地：Nutshell Hong Kong(5524 9455)

由16年电影《点五步》到早前的ViuTV剧《无限斜栋有限公司》，入行5年，Himmy虽然觉得好彩，但仍未满意，「比起好多人好彩咩都试过，电视剧、广告、电影，但系永远可以再好啲，所以唔会话好满意。」他最想可以疯狂演戏，「我其中一个梦想系攞奖，所以好想演一啲有发挥角色，他朝有日上台多谢我好想多谢嘅人，特别系我屋企人同埋我嘅老师廖启智。」

亲父默默支持追梦


Himmy坦言还未能接受廖老师走了，因为两人缘份实在太深，「我入行好大原因都系因为佢，接触戏剧都系因为佢，如果唔系佢我唔会有机会咁快拍到电影，《点五步》系佢推荐我做，我同佢好有渊源。佢好似我父亲，有时喺片场都会喺度提议我，或者讲畀我知点样可以做得好啲，好想我好。特别想上台多谢佢，如果唔系遇到佢或者识到佢，就算我读电影学院都未必咁顺利，中间可能会放弃，佢帮助我好多，佢嘅离开令我觉得更加想做多啲嘢，希望佢会为我骄傲，曾经有我呢个学生。」



除了这「父亲」，原来Himmy亲爸爸也一直默默守护着他，「当年我带佢睇《点五步》佢冇乜反应，到睇《沦落人》佢好似知多咗我嘅世界，有次佢车我去做嘢无端端同我讲，『阿仔，如果你想做就咩都做，冇钱都去试』，我好愕然佢会同我讲呢啲说话，当刻系感动嘅。到我人生第一次做舞台剧《逝去的花火》谂住佢忙未必嚟，点知见到佢喺度我喊到收唔到声好感动，我唔知道佢心底里好支持自己，仲同我讲『喊咩啫！系咪有T恤嗰啲纪念品要买』，系cute嘅！」