【独家】狂收恐吓留言戴眼镜遮样受访 韩子亮嬲爆力数保锜虚伪反骨

歌手韩子亮(TL)上周在IG Story连环出Po，指香港某组合成员涉嫌迷奸及行为「狗公」，之后更指保锜「你准备退出娱乐圈」。但随住TL畀公司照「肺」，呢件本属非常严重指控的事件唔够一周就Close File，对于「放生」吴保锜，戴咗眼镜嘅TL接受本报独家访问力数对方虚伪反骨，兄弟前兄弟后但背后就伸你一脚，仲奉劝对方：「食嘢小心啲，因住食鲍鱼食到滞！」对于旧老板嘅言论，记者以短讯联络保锜，但他已读不回。采访：梁思正 场地：The Wave@观塘

上周韩子亮连环喺IG Story出Po闹爆保锜，事后TL每日收到几百个攻击讯息。上周五，TL现身接受本报访问时，戴住平光眼镜、CAP帽及口罩嚟「保护」自己，多番要求也不肯除下影相：「平日我唔戴眼镜㗎！唔系吹水，真系惊㗎！佢啲fans留言话『唔好喺条街见到你呀！』𠵱家我阴影多过佢。」

送钱畀保锜食饭
提起保锜，TL真心嬲，仲耿耿于怀向本报解构两人恩怨情仇，「2016年我离开旧公司自组娱乐公司，当时觉得保锜周围去casting，对呢行好有Heart，加上我想做组合就签咗佢3年，讲明冇底薪。签约后佢嫌我出歌慢，竟然走咗去我旧老板度话想出歌，后来返嚟同我讲：『只歌好难听唔想出，要跟返我。』当时我又心软，其实我都好take care佢，当年我畀咗6位数字佢食饭、买衫、交租唔使还，后来佢话想参加《全民造星》求我解约。」

保锜扮惊咪嬲爆
至于保锜分别喺演唱会及《ERROR自救TV》节目中翻炒抢咪事件，TL好嬲：「其实佢都有抢过我枝咪，只不过我冇拍低条片，呢件事系我处理得唔好，但我冇谂过佢会咁介意！因为完骚后我哋一齐去食嘢，佢安抚返我话：『你枝咪冇电嘛，好兄弟有你有我，冇所谓啦！好少问题啫！』好啦，两年前佢喺演唱会度放完段抢咪片出嚟，我畀人笑，抹杀晒我嗰两年用心做歌洗底嘅血汗同金钱，一心谂住你好开心做到你想做嘅嘢，我都唔介意，就算俾保锜粉攻击咗我两年，我都冇出声，我咪成全你当睇唔到罗，之后见到个节目真系火到嚟，佢仲去埋鸭寮街望住枝咪扮话好惊，咁惊点解可以参加到《造星》？」

保锜好锺意媾女
TL愈讲愈火滚，直指保锜红咗就踩低他抬高自己，「又话跟TL系为咗搵食，佢啲歌咁『骑呢』，当初签佢返嚟，虽然未出到一首歌，但团队有付出过有努力过，佢唔识尊重人，忘恩负义反转猪肚，呢个人真系好反骨。」TL仲力数保锜为人虚伪见人讲人话，「佢个人太假，成日话『有你有我』，『好兄弟』，『韩老板前韩老板后』，仲行埋嚟扫你两嘢，但转个头伸你一脚，害你。」最后TL话多次亲眼见证保锜经常flirt女，又直指对方手多多：「佢成日落Club，醉醉地揽吓人哋条腰，我有班网红，佢成日话想媾边个边个，好麻烦，甚至我同佢一齐做网台访问，佢突然间过咗隔离同人倾偈，跟住唔见咗人，我有提过佢，但当时佢未出歌唔算系真正出道，我以为佢出咗道，经已系艺人会改变吓生活习惯，点知都系咁样。」