【独家】《热唱吧》演非常音乐教师 周国贤庆幸曾遇影响一生老师
2021-08-22 20:45 
周国贤（Endy）在电影《热唱吧》演绎非常音乐老师，跟陈慧敏饰演的学生擦出不少火花，讲到现实的学生时代，他自认不算乖学生，但庆幸同样遇上影响一生的好老师。对于早前凭电影《一秒拳王》先后获得「香港电影导演会」颁发「最佳男主角」及「香港电影编剧家协会」颁发「最佳电影角色」，他坦承对演戏更有信心。撰文：杜淑霞 摄影：张咏森 形象：@felixchan5 发型：[email protected] 化妆：Winki @vinciwinki.winki 服装：@karmuelyoung_official 场地：Metroplex
Endy笑言导演找他演老师，可能看到他有误人子弟资质以及顽皮老师一面，「电影入面我演一个几锺意恶作剧啲学生，甚至乎寸佢哋，似个哥哥多过似老师，尤其对住陈慧敏演嘅『小芳』。导演想我有啲反叛，有少少坏，我就谂到《GTO》反町隆史个角色，当然唔系去到咁极端，佢系暴走族嚟，我抽咗20%落去，当然个样模仿唔到佢，虽然我都想！」
仍未接受得奖
讲到读书时代，Endy自认不算乖，自从移居纽西兰后性格变反叛，又爱整蛊人，经常被记过，不过他跟「小芳」一样同样被个非常老师启发，「F.6嗰年上美术堂，成班30几人画水彩画，个个都系用笔画，我锺意实验，唔知点解将啲颜料放咗喺只手度印落幅画度，觉得好靓喎！隔离乖同学见到告发我，老师走过嚟我心谂惨，又记过啦！点知佢皱晒眉望咗我幅画10几秒，之后话『你哋全部放低支笔，跟住佢咁画啦！』哗！原来你追随住自己个心系啱！呢件事影响一世，我觉得艺术无论画画或者写歌都好，唔好畀个框架框死住，有时我钻咗牛角尖，老师个样就会浮现出嚟，我就会停一停用另一个方法重新嚟过。」
早前先后夺得两个电影奖项，Endy原来到现在仍未能接受，「唔知我畀人音乐人嘅感觉好强，定我自己仲未觉得自己系个演员，冇谂过做任何嘢去得到一啲电影上嘅奖项，攞到个咁大嘅奖可能人生得一次，真系唔知㗎！但系我自己都觉得，真心有待磨练，好多地方如果畀我𠵱家做多次，一定会做得更好，但系亦都系一支强心针，起码原来我都可以喺电影嗰度发展㗎喎！」
最新回应