靠龙婆一角深入民心 罗兰姐：初初以为系做「聋婆」

罗兰日前获薛家燕的邀请，与鬼王潘绍聪接受新城节目《光影梦工场》访问，入行超过60年的罗兰姐，曾参演超过三百多套电影，但最初入行原来是「睇人拍戏」，她笑说：「嗰阵我18岁，陪同学睇人拍戏。导演想搵人演工人，同学唔肯拍，我扎住孖辫，所以搵我去拍。嗰时系李鹏飞（鹏飞叔）做老爷，老爷讲完对白，我应一声『哦』」就可以。」机缘巧合之下，罗兰姐就献出了「第一次」：「当时我屋企环境好差，冇钱交学费。冇学返，就跟同学去睇拍戏，做完嗰一场临记有10蚊，但我唔敢同屋企人讲，因为屋企人觉得『成人不成戏，成戏不成人，贪威识食练精学懒，你就去做戏』！」

当以为『明星梦』已完，但其实才是罗兰姐真正的开始：「三日后，剧务去我屋企搵我再拍另一场，妈妈好惊讶，唔准我出门口。剧务求妈妈，话如果连唔到戏佢就会失业，所以妈妈心软俾我去拍，最后妈妈跟去片场，拍完戏后妈妈想我继续搵工，但我当时未有身份证，好多工都唔请，所以我求妈妈俾我再去拍戏，点知从此就拍咗好多套。」

讲到恐怖片，罗兰姐在电影《七月十四》中饰演龙婆，一定最深入民心，但原来罗兰姐最初以为是演「聋」婆：「当时导演嚟搵我，我仲以为系做『聋」婆，其中有一幕要敲经念佛，但导演又冇话系咪『聋』，我当时冇再追问就照做。记得有一幕系刘青云同陈明真去完旧屋坐车走，龙婆喺车顶大力拍落去，呢一幕吓亲好多观众。」其后龙婆角色变成又识问米，同鬼神挂勾，罗兰姐作为天主教徒，亦曾经因此而问过神父：「有日安德尊喺化妆间问我，作为天主教徒但做问米婆有冇抵触？我本身都冇谂过呢个问题，于是我见到神父就请教佢，神父话我系演员，我知道而家只系做戏，咁就冇问题喇。」