独家丨林作多谢「恩人」锺培生畀钱佢使 收到94万拳酬期票中秋夜庆功

林作及锺培生的「百万大战」上周六结束，锺培生未能兑现首两回合KO拳击新手林作，最后打足四回合以点数赢对方。周二中秋节当晚，林作设庆功宴多谢向柏荣教练团队，还识做地送上一张嘅8万8千8百期票畀师傅，并为拳赛作结说：「我梗系赢晒！客观嚟讲佢系畀钱我使嘅恩人，仲搞千万拳赛嚟捧红我！」采访：方骞平 摄影：叶君海

当晚出席庆功宴还有林作师兄李俊亨（Henry）及为他打气嘅女友裕美。林作乖巧地递上猪肺汤慰劳向师傅，又送上支票，𠱁到师傅笑到见牙唔见眼，随即加句：「多谢锺生！」

最快周五先收到94万

虽然拳赛后嘅林作尚未回气，面上仍见伤痕，但讲到得到百万拳酬仍难掩兴奋：「𠵱家等紧锺生找数，我喺本周一(20日)经已上咗去锺生办公室拎支票，扣除买拳赛飞钱，锺生个秘书好友善咁畀咗张$943,440期票畀我，我秘书今朝一早会去银行入数，最快周五先收到钱。」在旁向师傅问：「唔系拳酬同飞钱分开计，唔应该咁扣数㗎咩？」Henry也忍唔住说：「条友度(缩)怕林作走飞数！」林作笑笑口说：「咁应该攞住100万『靓仔』啲，不过，佢曾讲过话以优惠价卖飞畀我，𠵱家竟然收返正价，算啦！冇所谓我接受，冇投诉！」团队即取笑林作未收到钱，继续收声。

网民大比数撑佢赢晒

林作引用第一次世界大战后邱吉尔嘅金句解释：「战后要对敌人慷慨，更何况我经已攞尽光环，网上99.9%都系撑我，我好满意畀返0.1%credit佢！客观嚟讲佢畀钱我使系我恩人，多谢佢畀呢个机会我，尤其由负面形象转做正面，仲用千万制作拳赛嚟捧红我！所以今次得着好多，全面赢晒，佢真系一个大慈善家，系我再生父母，师傅预判得好，如果佢跌落我哋心理及战术圈套就会一面倒，我谂佢都估唔到会咁插水。」

锺培生战术错打得渣

向师傅做咗份赛后统计数据资料，指林作四个回合共打出121拳，清晰击中锺培生40拳，破坏性有7拳；至于锺培生四个回合共打出184拳，清晰击中林作40拳，破坏性有7拳，林作只系输主动性，所以指锺培生打得好渣，战术又错晒，唔应该唔限对手体重，而且体力差又沉唔住气：「佢第一回合狗冲耗尽体力，所以我叫林作食肥啲，去到第四Round锺培生因为太攰，被林作呢嚿肥猪肉压住都冇晒反抗能力。」对于网民指林作系「Running Man」唔收货，向师傅强调：「世界级都系咁走咁避㗎啦，只系佢『陀地级』唔够靓仔，其实得半年时间做到心法经已好好。」Henry就不满锺培生下巴轻轻，两次向他挑机都走数逃避交手，唔系武者所为！