吴丽珠忆与许冠武拍拖12年 结婚前才反思非那杯茶

至今仍单身的吴丽珠（珠女），近日接受电台《旧日的足迹》访问，过去她只曾跟陈百燊和许冠武扯上关系，她说：「我有好多段感情，只系嗰两段被人知道，不过我唔抗拒，我见过有人70岁结婚，我未试过，可以试吓。结婚唔一定等于幸福，当年同陈百燊系训练班同学，一齐几年，分开咗我唔想搬返屋企，余慕莲（余毛）就租咗间房畀我住咗一年，所以我好锡余毛，佢系我恩人。」

至于与许冠武一齐12年，应该好稳阵？珠女却说：「可能我唔系要求呢一样嘢，我哋拍拖唔系Sam（许冠杰）介绍，因为我哋（与许冠武）都锺意夜蒲锺意饮酒，分开咗先反思原来我根本唔喜欢嗰种类型，我着重玩要投入之外，做事都要认真同有责任感。当年我哋计划去拉斯维加斯结婚，连主婚人都约好，但嗰阵我刚出嚟做地产，见到外面嘅世界，感到对方未必适合自己。我同佢倾，佢似乎冇乜反应，我再表示我要离开，佢都冇反应。」
珠女续谓：「我仲记得我唔想佢妈妈唔开心，因为我哋同佢妈妈一齐住，于是我好似蚂蚁搬家，每晚返去偷走一啲衣物，我唔想佢见我一日之内搬走所有嘢，因佢妈妈都锡我……后来我冇交代，但我都有出席许妈妈同许冠英嘅丧礼，因为我觉得我哋两个人嘅事，同佢嘅兄弟姊妹同妈妈冇关。」