独家│何超盈童心未泯兴奋过2岁囡囡 短裤街坊Look扫玩具

已故赌王何鸿燊四房长女何超盈，2020年做人妻嫁畀细佢7年嘅哈佛大学高材生辛奇隆（Thomas），二人育有一女。眨吓眼辛千觅（Audrey Rose 「荷包蛋」）已经2岁，性格亦都更见明显。早排超盈带囡囡去买衫仔鞋仔同公仔，「荷包蛋」好似冇乜反应咁，以为小妹妹心情麻麻，点知日前超盈再带「荷包蛋」去买玩具，小妹妹对玩具又系冇兴趣，呢位小朋友个性相当得意呀！采访:梁志明

「荷包蛋」含住钻石钥匙出世，基本上要乜有乜，但不论家底富唔富裕，小朋友本性应该都系贪玩㗎嘞！不过「荷包蛋」与众不同，见到玩具都不为所动。日前戴住粉红Cap，着牛仔短裤的超盈同囡囡喺铜锣湾行玩具铺，一入铺头超盈已经跳跳扎，睇落仲开心过个女，真系童心未泯呀！「荷包蛋」全程都坐喺购物车，由妈妈超盈递玩具问佢意见，但「荷包蛋」依然好似闷闷不乐咁，近距离见到玩具都提唔起劲，咁奇怪都有嘅。

培养个女要有时间观念

虽然「荷包蛋」对玩具冇兴趣，但完全唔影响妈妈超盈血拼嘅决心，最后买咗几条公主裙同智能儿童手表畀「荷包蛋」。买公主裙唔知系咪想帮囡囡搞化妆舞会呢？至于买智能儿童手表，相信超盈可能想培养「荷包蛋」嘅时间观念，加上可以影相拍片，话唔定培养到佢爱上摄影，以后父母突然想留倩影都唔怕搵唔到人揸机啦。

「荷包蛋」全程唔使落地

「荷包蛋」喺玩具铺行咗几步路，就即刻坐上购物车。而离开玩具铺之后，「荷包蛋」一样唔使落地，事关佢行到边都有工人姐姐抱住。不过超盈并唔系将个女交畀工人照顾就算数，沿路都有Keep住同「荷包蛋」倾吓偈，关心吓个女。临上车前，「荷包蛋」指住个天好似有嘢发表咁，超盈都即刻走近听囡囡分享，深怕囡囡觉得被冷落。上到车就亲自抱「荷包蛋」坐返喺佢个专属位置，真系当正公主咁照顾有加。平时超盈畀人服侍惯，而家做咗妈妈要照顾返囡囡都有板有眼，呢位妈妈认真抵赞呀！