独家丨姚炜帮拖做嘉宾鼓励张伟文 退隐歌坛40年 曾生无可恋放弃自己

68岁的「靓声王」张伟文于4年前因腰椎病不良于行要坐轮椅代步，最惨身边「冇人冇物」，已花光一生积蓄嚟医病，医完腰椎，又出现颈椎及脑退化问题，多年来只能靠歌手好友方俊(Aman)帮手负担护老院支出及医疗费。伸出援手一事令退隐歌坛40年嘅姚炜姐深受感动，决定出山帮拖，做《张伟文友情有义演唱会》表演嘉宾。采访：方骞平 摄影：沈健程 场地：太子翡翠明珠海鲜酒家

方俊(Aman)曾经于甄妮、张伟文及静婷等演唱会做过嘉宾，即使同张伟文冇血缘关系，为咗报答当年提携之恩，在张伟文坐轮椅嘅日子随传随到，出钱出力，之前张伟文就曾于TVB节目《东张西望》中爆喊感谢方俊的照顾。



向张伟文传福音

72岁的姚炜姐亦被方俊的出钱出力所感动，知道张伟文需要开演唱会赚个钱傍身，决定为他举行的3场演唱会任嘉宾，台上跟张伟文合唱《楼台会之六》，姚炜姐强调今次纯粹系撑张伟文，不论拍戏及唱歌都唔会复出。日前方俊首次约埋姚炜姐同张伟文茶聚，两人兴之所至清唱两句《戏凤》，即席夹歌。姚炜又试图向张伟文传福音，希望借助宗教力量令张伟文可以企返起身：「佢年纪唔算大，但日日坐喺轮椅发吽哣，身体只会愈嚟愈差，我都想鼓励吓佢郁多啲，尽量试吓起身踎低。」姚炜姐又赞张伟文把声咁靓，唱歌咁好，「希望帮到佢企返起身唱歌。」不过方俊指伟文双脚麻痹已经企唔到。张伟文就表示「唔敢谂！企喺度唱歌会有危险！不过，前辈咁帮我都好感动。」闲谈间，张伟文又提到已故双亲一度悲从中来，要姚炜姐开解。

分享悲惨大半生

原来作为基督徒嘅姚炜同郑秀文有段小故事：「当年咁啱我喺电梯内撞到郑秀文，睇报道知佢有情绪困扰，虽然互不相识，但都鼓起勇气邀请佢去查经班，点知佢一口答应仲即时带埋佢过去，及后Sammi比我更早成为基督徒，𠵱家Sammi仲成日帮有需要嘅人祷告。」问到伟文想唔想Sammi帮他祈祷？伟文却说：「我系无神论者唔信呢啲，但我接受得到。」姚炜姐觉得传福音畀有需要嘅人会容易啲，「好似我咁都系60岁先喺约旦河洗礼。」她又向张伟文分享信主前悲惨人生，曾因事业低潮、患癌及婚姻触礁感到生无可恋，曾服食40粒安眠药、加一杯白兰地及割脉三料自杀，但获救后仍自暴自弃，沉迷赌搏，输咗成千万：「𠵱家我生活状况好到不得了，帮到人经已好开心，如果凑到一个人真心信主仲好过中彩票，而喺信仰下同赵式芝嘅母女关系都修返好。」