独家丨陈柏宇对事业积极唔再hea 疫情改变被动工作态度

陈柏宇（Jason）相隔4年宣布下月10及11日在红馆举行《陈柏宇Fight For ___ Live in Hong Kong Coliseum》。他承认疫情下令思想有了很多转变，以往因未够信心，只懂得被动被安排工作，令合作团队也误以为他好hea，但现在他对自己歌唱事业变得更主动积极，正是他今次演唱会「Fight For」主题由来。撰文：杜淑霞 摄影：沈健程 发型：Alex So @ the attic 化妆：Jessica Chan 服装：Junya Watanabe by ITeSHOP & Levi's

Jason坦承以往会很被动，出道15年以来，任何事都由公司安排，在疫情下令他重新思考，「回想出道开始，呢行嘅嘢都系由人哋去安排，唔系一啲自己去争取返嚟嘅嘢，个人比较被动，到疫情开始就慌，收入下降，冇办法去做嘢，就谂有冇嘢令到自己心态上冇咁慌，于是就去学唱歌，控制自己嘅事业多啲，令到自己更有价值。」

歌艺学无止境

变得积极进取的Jason笑言同事会觉得他变得更烦，「疫情时同好多身边嘅人倾偈，原来我喺好多人眼中系冇乜要求同hea啲，帮我嘅人接收到呢个讯息都会hea啲，同埋自己对音乐嘅知识同能力有限，我入行开始就系要学嘢，系觉得自己冇足够信心去表达，所以成日唔表达，因为我唔肯定自己个idea系好定唔好，唔肯定自己嘅要求合唔合理，今年开始呢样嘢要变，事业里面对外成就之外，对内嘅关系系点都同样重要，我唔能够为咗个效果，而牺牲晒所有人嘅努力，同时间我亦唔可以为咗咁多人嘅努力，而牺牲晒我有机会为自己争取到嘅嘢，所以有『Fight For』呢个题材，但系啲同事系烦咗。」


这个演唱会是Jason扚起心肝学唱歌后首个个唱，这段日子令他更觉得学无止境，「学唱歌唔系一朝一夕嘅事，唔系我今日畀几招你就会突飞猛进，唱歌系一个体能嘅锻鍊，要时间，一啲根深柢固嘅习惯唔系我同你今次录音时改咗，唱现场就冇问题，想唱高音一度或半度，唔系一两日嘅事，可能要一两年。」但他很享受这个改进过程。