独家丨林子博移英出首份粮出街食饭庆祝 闹爆楼上邻居狂丢未熄烟头

50岁林子博遵从亡妻董燕君遗愿，今年8月底带同16岁长女咏渝及12岁细仔卓楠移民英国，至今生活已安顿下来，一家在曼彻斯特落脚。对于半百人生先嚟适应新生活，子博被赞有勇气：「佢两个系我最宝贵最亲嘅人，所以点样改变都冇所谓，最紧要佢哋喺我身边。」采访：方骞平

林子博移民英国初期波折重重，尤其抵英一个月后仍跟子女住喺曼彻斯特的酒店，由于酒店并非有效的住址证明，子女迟迟未能报读学校被网民闹爆。后来全家人又搬到到郊区诺域治，惟因未能为子女报读学校，无奈又搬返去曼彻斯特，𠵱家子博以月租1,100英镑（约1.2万港元）搬入一个全新嘅3房公寓单位，内里有齐家俬电器包车位，不过由于用料较差甩漏处处，！

怕得重症带仔去打针
不过讲到最令子博不满是非常冇品的楼上住客，「屋苑内冇华人，我住喺低层，但露台成日发现未熄嘅烟头，楼下公家空地更加系重灾区，真系嬲到爆。我惟有摄字条去住户信箱，提醒楼上住客唔好乱抛烟头！如果楼下火烛楼上都走唔甩，我唔系挑衅都系讲道理啫！」除此之外，英国至今(截稿前)有32宗新变种病毒Omicron确诊个案，子博日前同阿仔都去咗打疫苗，「都冇得话惊唔惊，而系控制唔到，最惊反而系呢度啲人唔戴口罩，学生除咗中招唔使返学，学校规定病住都要上堂，但佢哋又唔戴口罩，真系几大镬，所以要去到打针呢步，就算预防唔到，都唔想受感染后得到重症。」

久不久帮衬中式超市
子博强调全家人出外都有戴口罩，亦好少去人多挤迫嘅地方。「之前咏渝及卓楠交叉感染发烧唔退，英国冇乜人睇私家医生，多数买成药搞掂。」英文麻麻嘅子博为咗子女努力适应新生活，「冇问题喎，我哋上一代咪就系咁有冒险精神落嚟香港，每个人移居都系想追求另一种生活。卓楠读紧year 8，咏渝就读专科学校，两个都识到啲新朋友，咏渝仲搵到排舞室学跳舞，大概4至6蚊英磅一堂(约41至62港元)，收费算平。而我做地产公司主持直播都出咗第一份粮，一家人出咗去食饭庆祝，如果唔系成日出街食饭份粮都够使，呢度一包大鸡扒有12块只系卖30蚊港元(3英镑)咋，真系开心价，𠵱家两父子会喺屋企煮饭，首选食较平嘅地道嘢，食到闷闷哋先会去中超买餸，相对菜芯等中式嘢价钱较贵。」