独家丨张振朗地狱式辛苦拍到喊 拍《拳王》狂食丧操兼戒水

张振朗早前公开《拳王》爆肌相，大家睇到哗哗声。其实今次振朗为操弗身形演好拳手「海正蓝」，足足花了一年狂食增磅兼丧操，日日似活在地狱。到正式拍擂台戏，更要戒水兼要不断打，振朗形容好似在地狱最底层，半夜瞓紧会抽筋痛醒，不过就算边按摩边爆喊，他依然觉得一切都值得。不过振朗不求获奖回报，反而会投票给首度合作、教足他全程的好对手黎耀祥。撰文：杜杜 摄影：沈健程  服装：JOURNAL STANDARD@IT  场地：千禧新世界香港酒店

振朗旧年开始担正第一男主角，今年先有《坚离地爱坚离地》素颜样衰演宅男，再到反差极大台庆剧《拳王》。 ​ ​

张振朗坦承这个身材，人生当中可能可一不可再。

开拍前一年，收到通知要演拳手，振朗不敢怠慢即操身形，「都想有咁劲得咁劲，起码观众觉得似个拳手，个过程真系吃力。」由于他属瘦底，要由平日只食两餐正常份量，持续食多三、四倍来增磅，「一日食4、5餐，每餐要食一大块鸡扒，再一大堆饭。」他仲要keep住一星期做足6日健身，「几攰收工都要去做，嗰时拍紧《踩过界2》都几地狱，仲要啱啱疫症健身室关闭过两次，头都大晒。」不过过程令他更能体会拳手辛酸，「呢个除咗帮到我外形，点样演都可以帮到手。」

操肌前先要增磅，对瘦底的振朗绝非易事。

增完磅要keep住身材，振朗主要食麦皮、鸡蛋同鸡肉打成汁。

事前准备已够痛苦，到真正开拍，振朗形容更似在地狱最底层，因爆肌身形拍摄4月都要维持住，「当然有时会乾身啲，有时冇咁乾身， 系我入行以嚟最辛苦嘅一套，首先个角色已经咁沉重，我又要喺个身体上面兼顾咁多。嗰时每日去做gym，再返厂拍12个钟，仲要打到凌晨两、三点。」到拍擂台打戏，更加到达辛苦顶峰，「拍前7日要脱水，一开波系咁饮水，但扫落去唔饮得水，第一日到唔饮水又要打10个钟，拍完返去郁唔到，瞓醒就全身酸痛，瞓瞓吓又两只脚抽筋，抽到唔会好番咁，要屋企人帮我按摩，到第3、4日仲要屋企人帮我按摩，我系按到喊，会谂点解我要咁辛苦呢？嗰12日都坚打，每次打10个钟，好似地狱咁样，到咗19层啦！」

日日健身，这份毅力连振朗都冇谂过自己做到。

连拍12日擂台戏，令振朗如在地狱最底层。

投票撑黎耀祥得奖

讲剧中要追击3届视帝黎耀祥，振朗直认首度跟祥哥合作，气场太劲确实胆怯，「硬住头皮去做，反而系转个方法不断问祥哥，当佢系个宝藏， 每日见佢好似盗墓系咁攞，我直情系问祥哥呢场戏点做好。」原来事前他已收风，知祥哥只要肯问会好大方分享经验，连问了几日后祥哥已知他企图，「我哋排一次，我就会望一望佢，祥哥就会话『想问我嘢呀』。」他更大赞祥哥好为后辈着想，「佢咁强大嘅人，其实可以质到我好细，但系佢仲会谂点托起我，系温暖嘅。」振朗觉得跟祥哥学习，如上了个戏剧精读班，「佢话演戏就好似好多站车程，错失任何一站就会唔顺，所谓起承传合，佢又叫我睇多啲唔同嘅书。张继聪都有同我讲睇吓《倚天屠龙记》嗰啲，睇多啲人哋嘅经历。」而他更视祥哥和阿聪为模范，现在遇到演出疑问，就会不时请教两位前辈，而他最感动他们都会主动留意他演出兼畀意见，「佢哋睇到一啲嘢会message我『振朗做得好』，边个场口就唔讲，但开心佢哋都会想我好，有留意我好开心，佢哋讲系咁样做令我信心大咗。」

振朗剧中视祥哥如仇人，现实却当正对方为偶像。

 

振朗听祥哥话多睇书，特别喜爱研究心理学。

近年因电单车结缘的张继聪，亦是振朗学习对象。

拍得辛苦当然望得到认同，但振朗不期望夺奖，「我咁多年嚟畀人话似边个似边个，今次畀佢哋感受到张振朗系好锺意演戏，为咗每个角色去得好尽嘅演员。而奖项我想攞冇用㗎！啲人唔锺意我做乜要攞先！奖项嘅作用系纪录由年头个宅男到年尾『海正蓝』，呢个阶段做过啲乜嘢。」他坦言宁愿将自己一票投给祥哥，「佢畀咗呢2、30经验我，仲要自己试过，知道边啲好边啲唔好，等我行短好多路，同埋好佩服佢57岁，嗰几个月都系食白烚鸡、西兰花极速收身，身形都好犀利，所以我会投佢唔投畀自己，上年我都系投畀祥哥。」

振朗去年凭《反黑路人甲》夺「最受欢迎电视男角色」。

得到祥哥悉心指导的振朗，更加认清未来演员路的方向。