古天后日志｜腾讯派送京东变相减持 京东短线难免受压

12月23日，早晚有一两阵雨，日间有短暂阳光，嚟紧圣诞假期天气转冷，下周一气海更显著下降。圣诞节假期将至，市场交投转趋淡静，不过美股隔晚反覆向好，三大指数上升，纳指继续跑赢。美股嚟讲，香港呢边嘅缸边友，其中一只最关心嘅股份，当然系Tesla(TSLA)，港股呢边嘅电动车相关股份，升升跌跌都受其影响，跌O左几日嘅TSLA终于重上1000美元，料可带动比亚迪(01211)呢O的电动车股继续反弹。

腾讯(00700)之前话要表决向小股东派发中期息，卒之有关决议嘅结果系向合资格股东持有每21股股份，获发1股京东集团(09618)A类普通股的基准，以实物分派约4.573亿股京东作为特别中期股息，相等于京东已发行股份总数约14.7%。以噚日收市价每股279.2港元计，拟分派的京东股份总市值约1277亿港元。完成分派后，腾讯在京东的持股比例将由17%降至约2.3%。

腾讯话就话向股东派发中期息，但事实系变相减持京东，仲要系大幅减持嗰只，今日京东股价难免受压，即管睇睇260元支持位守唔守得稳，守唔到下一个较强支持要落到240元。腾讯呢招都算绝，自己唔想再持有咁多京东，又唔想喺街到批，皆因数量咁多，目前嘅市况要搵人接都唔容易，索性拎嚟回馈股东，一家便宜两家著。

谂深一层，内地对于科网监管从未松过手，作为乖孩子嘅腾讯，生怕阿爷话佢同京东强强联手搞垄断，家阵大幅减持，双方关系撇清，自然唔存在垄断，咁阿爷系无说话好讲。呢一次减持，对两者嚟讲，长远未必系坏事，况且京东发展日渐成熟，亦唔再需要腾讯咁多back up，只系腾讯选择喺市况飘摇之际嚟减持，短线难免对京东带嚟压力。

明日平安夜，港股只有半日市，缸边友假日情绪浓厚，今日港股即使有反弹，喺入市意欲低迷下，预期欠缺成交配合，倒不如提早收炉，准备好放假狂欢。古天后就提早放假，明日专栏休息一日，下星期二回复正常。

古天后

(徐狄怡，证监会持牌人)