张敬轩七仙羽互咀加持 获赠言一路向西

张敬轩除夕夜举行第7场红馆骚，邀请七仙羽做压轴嘉宾，获全场核爆式欢呼。轩仔笑说︰「大家见到我未婚妻咁开心。」七师傅即回话：「吓？我哋乜都未做过喎，咪好唔抵……罗。」轩仔则表示︰「你又讲得啱，但系我好保守，有啲嘢，我要结咗婚先做。你今日彩排叫我咩话？你记唔记得？」七师傅答︰「老公……唔系……轩公」，令轩仔笑到弯晒身。七师傅又拖住轩仔手问︰ 「你只手咁冻，你系咪吓亲？做足18场，日日咁唱真系好辛苦。」轩仔就好识做表示︰「你带温暖畀我咪得罗，你有咩秘方教我补下身？」七师傅竟然回答，「下一世唔好做歌星啦，太辛苦啦！做国王算啦你。」轩仔则爆笑反问︰「吓？国王后宫佳丽三千，我个肾点搞？」七师傅继续淡定回答：「你剩系独爱一个人咪得罗！」笑到大家标眼泪。

七仙羽做压轴嘉宾，与张敬轩拖住手仔出场。

互派心心甜到漏。

当观众起哄叫轩仔「咀佢」时，七师傅则抢答：「我ok㗎！」随后轩仔用疫情来推却，岂料七师傅穷追不舍，最后在全场欢呼下，轩仔盛情难却咀了对方脸颊，当然七师傅亦礼貌地「回咀」，轩仔就笑言今年得到七师傅嘴唇加持，一定好运过人，不如请师傅再加指点甚么方位适合他？七师傅回答︰ 「我计过你条命啦，西面最适合你，你一路向西啦！成个红馆都系西面，我畀个锦囊你，你带睡袋行李搬来红馆住啦。」又突然叫人拿出一个垃圾胶袋：「我本来想送层楼畀你，但又惊爆绯闻，啲人话我包养你，所以我用好长时间，自己亲手做份礼物畀你，个垃圾袋系因为出来太赶啫。」接着由垃圾袋中拿出一个能量塔，望对方日日开心！

老板杨受成到来捧场，并在后台大赞轩仔演出成功，互相拥抱祝贺新年。