独家丨林作撑「盲抢炎」入超市狂扫两车货 不敌妇女抢粮受伤流血

本港第5波疫情严峻，加上网上流传指政府将计划「全城禁足7日」，消息一出，市民即四出储粮入货，多区超市出现抢购物资人潮。昨日林作与女友裕美(美美)及工人姐姐响应「盲抢炎」到超市大量入货，丧抢冻货期间，林作被师奶嘅指甲𠝹到手背流晒血，要用纸巾嚟止血。不过，他都出师得利扫满两架手推车嘢，埋单要4300多元。

 

林作大赞裕美孭埋个袋兼且推车，非常打得。

 

林作跟妇女一齐抢粮时被指甲拮亲手背流血。

 

都抢到有好多战利品。

 

足足有两车货。

 

被嘲惨烈过锺生拳赛

昨日他喺社交平台分享有关相片及短片，见到裕美与工人姐姐推住两大车嘅战利品，写道︰「我准备好封城啦！来吧！禁足吧！刚刚在超市同全场9成女士片完，只手流晒血，但成功喺丧尸堆抢走四千几蚊货，遍布鲜肉、乾粮、日用品等，够我顶到月尾。我支持禁足…」有网民见到他受伤嘅相片后，留言取笑他说︰「战情惨烈过同锺生拳赛。」

 

埋单要成四千几蚊。

不过两车战利品仲未「打爆」林作家中巨型雪柜。

 

林作上足一个月粮为有可能禁足做准备。

裕美孭袋推车好打得

谈到受伤经过，他接受本报访问时说：「因为见冰柜得返几包冰鲜乌冬，我同好多妇女一齐伸手入内抢，就系咁畀指甲拮亲，而我嘅英勇受伤要用纸巾止血，同埋要咀咒令我到受伤嘅家庭主妇，美美就帮我孭埋个袋兼且推车，非常打得。」他又直击指，其实超市货品算系仲有：「但要睇吓系乜类型嘢啦！可储备嘅冰冻乌冬就摆明断货，抢净得返几包，其他嘢都偏少，蔬菜都冇喇，得返啲西兰花，不过系我最爱。」

 

裕美系林作得力女友。

 

扫完货一齐去食饭。

未雨绸缪系保险意识

他解释唔系响应「盲抢炎」，而系有理据︰「因为我有保险意识，既然唔知会发生乜事，所以𠵱家要储备一个月粮，而且我想尽快习惯喺屋企匿埋嘅感觉，唔好禁足先嚟适应，想心里快啲得到平静。」本报又从林作提供嘅独家相片可见，战利品还未能『打爆』他家中巨型嘅雪柜呢！

 

裕美变身「疫境厨神」，常在林作家中玩煮饭仔。

 

林作及裕美常留家抗疫。

 

裕美被林作偷影睡姿。

 

更多第5波疫情资讯，请到以下专页浏览（按此）

立即下载｜全新《星岛头条》APP：https://bit.ly/3yLrgYZ