独家丨诸葛紫岐同囝囝除罩冒险食雪糕薛嘉麟戴两个口罩陪老婆入货

2022-03-16 22:30

诸葛紫岐（Marie）自2012年嫁畀Neway二公子薛嘉麟后育有两子，一直过住阔太生活。不过近年受几波疫情影响，老公啲卡拉OK生意都几湿滞，不过睇嚟对两公婆嘅生活冇太大影响。日前《头条日报》记者撞到成身新款名牌的Marie与老公带同就快3岁嘅细仔薛华舜（Anderson）喺铜锣湾行超市，仲有两个工人跟住，加埋专车接送，依然好有阔太风范，见小朋友买咗雪糕即刻除罩食，Marie又忍唔住除罩食两啖，小心啲好喎。采访：梁志明

Marie同薛嘉麟结婚10年，Marie有时都会向老公撒娇，呢日离开超市都主动拖老公。

Marie同老公薛嘉麟育有两子，分别是8岁的Arthur及2岁的Anderson。

近年受几波疫情影响，薛嘉麟啲卡拉OK成日都要停业，生意颇受影响。

薛嘉麟跟实老婆买嘢，都系行吓睇吓，买咩其实都系老婆话晒事。Marie呢日主攻啲即食嘢，好似面包、即食燕麦片、壳物片、蛋糕等，仲买埋日本拉面礼盒，应该都系食咗当去咗日本啦！而薛嘉麟就买雪糕畀个仔，又买杯嘢饮畀老婆。Marie平时凑开两个小朋友，有晒经验，带得两个工人出街一定有原因嘅，之唔系派个工人陪住细仔罗！自己就同老公争取时间，喺细仔食完雪糕前买晒啲嘢，真系好聪明呀！

Marie买完雪糕都忍唔住除罩食两啖。

争取时间上粮

带仔女行超市，好易畀佢哋搞到买漏嘢，不过小朋友有嘢食就会定晒，真系同「电子奶嘴」一样咁有效，Marie两公婆都深明呢个道理，一入超市就买杯朱古力雪糕畀细仔食，靓妈仲忍唔住食咗两啖，Anderson食得鬼咁滋味，由本来企定定食，到后来直接坐喺人哋啲摆设度慢慢叹。期间同工人姐姐有倾有讲，不过话晒有疫情，喺街除口罩食嘢都几危险。Marie就同老公争取呢一杯雪糕嘅时间，买晒所需用品，非常快手。

阿妈买朱古力雪糕𠱁Anderson，小朋友好开心，因为唔使戴罩又有得食。

薛嘉麟行超市都冇乜畀意见，主要都系由Marie拣买乜嘢。

疫情下连Tea都少食，Marie都买Cake返屋企慢慢叹。

认真拣维他命

除咗食物，Marie仲买咗支液体维他命B，睇返介绍就话有助提神醒脑、舒缓压力、增强抵抗力，仲话液体配方更易吸收，大人小朋友都食得。疫情下抵抗力好紧要，尤其家中有小朋友，相信Marie都好怕小朋友中招，埋单前仲搵个员工问清楚，比起买其他食物更加认真。以往Marie入得商场可能都会去行吓名店，但当日佢哋一家离开超市就直接上车返屋企，避免在街上逗留太耐增加染疫风险。