古天后日志｜港股于现水平整固 二万二水平争持

3月24日，密云，间中有雨，早上天气清凉。多名联储银行行长先后放鹰，而鲍爷都晒风，喺控制通胀嘅大前题下，有意喺下次加息时将利率调高0.5厘，市场亦渐渐消化加息步伐加快预期。只系美俄关系愈趋张，美国国务卿布林肯周三表示，美国政府正式认定俄罗斯喺乌克兰触犯战争罪行，将会与其他国家合作提出起诉。同日，俄罗斯外交部宣布驱逐美国驻俄外交官，并警告称，美国对俄罗斯嘅任何敌对行动都将会得到充分回应。

市场关注美国及欧盟讨论新一轮对俄罗斯制裁，可能落实禁运俄罗斯能源产品，国际油价急飙。欧盟成员国会否禁止进口俄罗斯原油和石油产品上仍存在分歧，市场关注其最新进展。一旦实施禁运，将进一步推升通胀，令加息步伐不得不加快。喺咁嘅情况下，美股隔晚走软，三大指数均跌逾1%收市，道指跌448点；标指跌55点，纳指跌186点。

至于港股由上周低位18200水平反弹，至重上22000水平，好明显由之前大量嘅空军冚淡仓盘所带动，虽然空军嘅冚仓盘，平淡仓后并未有需要再沽出，所以由18200点抽升至22000水平，并未见有任何沽压；但升抵22000水平后，冚仓盘已完成得七七八八，大市进入本周，成交亦明显较上周锐减，上升动力减退，港股亦进入一个整固局面。目前大市喺22000水平，再度出现一个好争持嘅状况。

由于下周三系期指结算日，预期喺结算前呢段时间，港股将会喺22000点水平上落，监于大量熊证结集喺22500-22600点，相对于过千张期指，唔排除大户集中挟升几集重磅指数股，令指数抽升至该水平屠熊。不过当指数升抵22500-22600点，亦刚好升抵由2月展开嘅跌浪跌幅6000点嘅反弹黄金比0.618，相信喺该水平嘅阻力唔细，亦有机会掉头回落。至于回落后，会否回补20700点所遗下嘅上升裂口，古天后有啲保留，尤其本轮反弹由冚仓盘所带动，即系并无获利货需要沽出，呢一个下跌裂口，短期唔见得会回补。适量嘅回吐，可能大市回调至牛证首个重货区大约20900-21000点已足够。若然喺呢段时间，大量牛证喺21200至21400点水平加码，大市回调首个目标可能就系呢个水平。若然经过调整后，未见有利淡消息，而俄乌局势有转机嘅话，回调过后，港股再展开另一段升浪亦不足为奇。对于市面上有个别分析，指大市并未见底，大市将跌穿万八水平，下试16800点呢啲讲法，古天后有所保留，事实上港股目前大部份股份，估值已调整至合理水平，只要业绩交到功课，似乎喺18000水平已系今年底部，未搵到理据支持港股要继续向下寻底。

古天后

(徐狄怡，证监会持牌人)