独家丨梁咏琪育儿心得唔好迫拒绝母女档上阵拍剧

2022-03-25 22:30

梁咏琪(GiGi)早于2004年已客串过TVB剧集《天涯侠医》，演张家辉已过世嘅女友，最近再挑战自己，为ViuTV新剧《反起跑线联盟》做女一。GiGi坦言20几年前已觉得拍剧系大势所趋，早有预算有朝一日遇啱剧本及角色会接拍，直至今时今日才缘份到，不过她就坚拒母女档演出：「未系时候住，我想佢(Sofia)专注返佢嘅生活先。」采访：方骞平

梁咏琪等咗20几年，初尝拍剧做女一。

GiGi曾于剧集《天涯侠医》中，客串演张家辉已过世的女友。

两母女都好锺意整饼，是亲子活动。

今次能打动到GiGi全因《反》属贴地家庭式喜剧，在疫情期间能带出正能量，观众会得到共鸣，而且GiGi跟导演刘伟恒相识10多年，大家都为人父母成日走埋一齐讲仔女经，所以喺剧集筹备过程中GiGi都有帮手度剧本，最后由她主演变得好顺理成章及圆满。

由于剧情讲7个家庭，GiGi要跟7个小朋友演戏，真系少啲精力都唔得。

GiGi唔会迫囡囡。

Sofia爱唱歌唔拍戏

GiGi最开心可以跟潘灿良及周家怡一齐演出，而「老公」强尼更正到不得了，呢个配搭好有新鲜感，同7个小朋友做戏亦算顺利：「佢哋好聪明，唯一我要适应跳拍。」至于点解唔再紧贴啲，现实母女档上阵呢？GiGi即耍手拧头：「自己做戏仲要顾埋佢我搞唔掂，虽然都有人搵过我哋，但暂时佢冇兴趣拍戏住，佢只系锺意唱歌，而且佢冇演戏经验，麻烦到人哋就唔好喇，我想佢先专注生活先，暂时冇呢个计划，不过小朋友谂法成日变，第日再问佢意愿。」

GiGi形容戏中老公强尼好正，两人好有火花。

明白细路仔冇得迫

《反》剧以香港家长嘅育儿问题作题材，剧中GiGi本是一名记者，但为照顾4岁大囡囡瑶瑶而转为全职家长，剧中角色跟GiGi现实中初做家长嘅情况相似，「好似讲到小朋友偏食问题，作为父母冇办法迫佢食，所以会出尽法宝扮埋番茄𠱁佢食，呢方面Sofia都试过，因为佢唔锺意食带点烟韧嘅菇类，惟有研究变成磨菇汤等，始终唔可以同小朋友讲道理，佢哋个触感同大人唔同，父母要明白佢哋有佢哋嘅进度及时间表，要加以迁就唔可以套落我哋身上，否则只会有反效果。」

GiGi跟剧中囡囡「瑶瑶」都好亲近，「瑶瑶」一见GiGi就叫她做妈咪。

喺埋位前，梁咏琪煮西班牙菜慰劳台前幕后。

做好份内事就足够

不论戏里戏外，梁咏琪都支持「反起跑线」，坚持囡囡开心健康地成长，唔想变身「虎妈」、「怪兽家长」：「疫情下都冇乜出街，留喺屋企日夜对住小朋友，要喺局限环境下安排好每日嘅时间表，搜罗咗好多益智嘅游戏同佢一齐玩，同佢建立共同兴趣令佢身心都可以健康发展，真系一个好大project。」GiGi亦冇安排囡囡上补习形式嘅网课：「我个女适合轻松学习，除咗学校安排上Zoom，其他大部份时间都系玩，呢啲要配合佢学习能力系冇得迫，其实疫情下佢喺屋企做晒份内事，刷牙、洗面、做好功课就得。」