独家丨薛家燕执衫难忘真空Deep V晚装 义卖300件衫助弱势社群

第5波疫情影响到各行各业，薛家燕向来关心弱势社群，上月尾度过72岁生日的她捐出300多件新净「爱心衫」来义卖，将不扣除成本全数捐去慈善团体莒光文化服务基金，帮助有需要的香港市民，家燕姐引用《皆大欢喜》歌词：「团结一心有新转机。」望港人能互助互爱捱过疫境。采访：方骞平

Fans笑住买，因为有得做善事，又收到内藏虫草、水晶及手袋的福袋。

家燕姐一早现身Fans优先场感谢「忠粉」，全程企咗十粒钟。

薛家燕自95年主演TVB处境剧《真情》后红足27年，由视坛踩到影坛，甚至成为广告商及登台嘅抢手货，作为专业艺人，家燕姐坚持每次出镜都要换新衫，登台及拍广告更加会订造新衫配合，所以每年服装费加租仓费要几十万，多年嚟累积咗超过4千件战衣，全部企理地放晒喺衣帽仓，有啲仲系未开封，但又唔想浪费，最终决定搞义卖爱心衫大行动，割爱平价益Fans，收益用嚟行善，目标筹到十几万善款。

《真情》戏服亦好受欢迎。

TVB经典剧《真情》令家燕姐红足几十年，真系好旺。

唔舍得黄色登基裙

除咗有批衫会预留5月1日做新城网上直播时公开出售外，家燕姐另外执咗一批靓衫畀几十个fans于日前(18日)优先选购。《头条娱乐》记者直击家燕姐喺二千尺衣帽仓执衫过程，由于数量众多加年代久远，好多衫已忘记出处，当中执出嘅《皆大欢喜》及《真情》等戏份勾起好多难忘回忆，尤其重拾红色芭蕾舞短裙更得啖笑，有啲跳舞裙𠵱家连扣都扣唔埋：「最正系搵返2003年拍瘦身广告嗰件粉红色低胸晚装，当时要真空上阵，仲瘦咗20几磅得返120几磅，𠵱家肥返晒。」家燕姐笑说：「哈！如果𠵱家搵我拍纤体广告都会拍㗎，但唔使太瘦罗。」面对「断舍离」，家燕姐有极大难题：「好似喺2016年台庆颁奖礼着过嘅黄色登基裙咁好有意头，都唔知好唔好出售？咁旺我都系收埋先，留返个意头畀自己。又有啲登台战衣唔系个个啱着，但用料靓，造就贵…。」

19年前，家燕姐着呢件Deep V晚装拍瘦身广告。

她表示当年要真空上阵。 ​

家燕姐手执当年嘅芭蕾舞短裙都觉得好笑。

呢条裙嘅腰围同𠵱家争好远。

16年家燕姐同麦包出席TVB台庆颁奖礼。

最后家燕姐都系唔舍得出售「登基裙」。

好有爱心的家燕姐，为帮助弱势社群首次举行「爱心衫」义卖活动。

用消费券买得疏爽

讲到义卖优先场情况，家燕姐形容反应热烈：「尤其最近TVB重播《真情》，对Fans嚟讲系个集体回忆，加上有消费券又近母亲节，而且好多广告客户好撑我，买衫回赠价值几百蚊嘅福袋，佢哋买得好疏爽，个个买成千蚊，暂时成功筹到几万蚊。见到Fans咁支持行善好感动，真系好多谢佢哋。受疫情影响，一啲住劏房、独居老人、失业人士生活得好困难，所以将善款买米粮、罐头等物资送赠佢哋，希望佢哋感受到有人关心，人间有情唔好咁灰暗。」

家燕姐系莒光文化服务基金慈善爱心大使，出钱又出力。

更多第5波疫情资讯，请到以下专页浏览（按此）
立即下载 | 全新《星岛头条》APP : https://bit.ly/3yLrgYZ