古天后日志｜长周末将至一动不如一静

4月28日，大致天晴，天气炎热。美股隔晚表现反覆，三大指数个别发展，走势上都系先高后低，纳指更倒跌收市。市场继续消化美企业绩，不过即使业绩后股价上升，亦似系超卖后技术反弹居多，古天后对美股后市睇法仍倾向保守。下周三联储局议息，市场早已接受今次加息幅度将达0.5%，市场更关注系议息会议对其后息口及货币政策路径嘅指引，即系之后嘅加息幅度，以及6月开始缩表嘅进度。由于美国核心CPI仍高企，预期货币政策将进一步收紧，对美股嚟讲当然唔系好事。
 
至于内地股市噚日反弹，不过未见成交大幅增加配合升势，可能跟五一假期接近有关，不过上证指数仍距3000点有啲距离，睇嚟都系技术反弹多于转势。喺人民币表现疲弱下，3月份外资从内地股市流走超过2600亿元，即使近日有外资回复流入，相对流出数字只属杯水车薪。

做好做淡都唔多值博 

至于港股昨日回落至19600水平前有支持，恒指收市回升至19946点，不过全日成交只有1251亿元，明显未见新资金流入，能否支持大市进一步向上仍有疑问。加上今日北水开始暂停，喺期指结算下，大市仍未有方向，加上下周一假期，长周末假期前，睇怕都系闷局一场。
 
4月份港股结束自3月中港股回落至18200水平展开嘅反弹，至22400点回调，并回补3月中上升裂口，重返20000水平，大市回补上升裂口后，由于未见资金大量流入，大市只系喺20000水平附近上落，唔排除结算后或步入上落市反覆格局。暂时见牛熊证重货区分布分别系19500至19700水平，而20500至207000则见大量熊证增加，喺大市未见方向，喺19500点20700呢千二点上下其手，好淡通杀易过借火。目前大市刚好喺20000水平, 亦即呢个范围嘅中间位，无论做好做淡都唔多值博，反正长周末假期将至，呢两日一动不如一静。

古天后

(徐狄怡，证监会持牌人)