独家丨伍咏薇买红酒贺结婚23周年老公陪Shopping有讲有笑

2022-05-03 07:00

53岁嘅伍咏薇(伍姑娘)近年影视作品唔多，但一出就好有Noise，如之前佢喺《金宵大厦2》其中一个单元「双鱼」演恐怖操控狂单亲阿妈「芬姐」，因为40秒换20次表情获网民激赞。日前，伍姑娘同结婚23年的老公练海棠去铜锣湾买嘢，两公婆由买嘢到等车都有讲有笑，最厉害系伍姑娘好眼利，话咁快就发现记者仲手指指。采访:娱乐组

多得「芬姐」一角，坊间有好多伍姑娘嘅访问，知佢为咗演绎「芬姐」刻意减7磅，减到全身乾晒，连毛孔都清晰可见，又知佢今年7月1日同老公练海棠结婚23周年，虽然老公曾爆出约会异性，但未造成婚姻危机，夫妻从冇讲过离婚二字，全靠沟通将感情升华，「一只筷子打唔响，多谢佢多年来对我嘅包容，基本上我哋唔会闹交，会去倾」。

讲唔完嘅话题
日前傍晚，伍姑娘喺铜锣湾名店坊的日本护肤品牌买嘢，拎住两大袋嘢嘅练海棠之后加入，两公婆一见面已经有嘢讲，然后加入埋售货员，三个人相当好倾。买完嘢一离开，伍姑娘去洗手间前发现记者，全程望到实再手指指，示意记者，「见到你啦」，记者争取时间问练生，佢话买咗啲红酒，当晚用嚟宴客。等埋老婆，两人一齐离开，等车期间，两人Keep住有对话，睇访问记得伍姑娘讲过同老公嘅关系，「我哋而家相处得好舒服，关系亦师亦友，是彼此好好嘅倾诉对象。」记者力证，系坚的。