独家丨阿正获阿爸赞叻差啲喊住食饭广告红人狂吸金六位数

2022-05-10 07:00

29岁，商台叱咤903 DJ阿正（黄正宜），自20年拍《胶战》杀入电视圈迅即爆红，广告接唔停，最近同时主持两个电视节目，包括唔执屋嘅佢拍住Jeremy主持一个关于执屋嘅节目《GO！执！事务所》及《MM730》。入行5年，阿正承认《胶战》令她赚多咗，可畀多啲家用阿妈，但未能靠此成功脱单，她自爆相士赠言31岁会有真正桃花，目前专心工作，提到近年事业唔错获阿爸赞好，阿正难得展现感性一面，「差啲忍唔住喊。」采访：杜杜服装：美华氏场地：The AIR (The ONE)

最近阿正拍住Jeremy@MIRROR主持《GO！执！事务所》。

阿正仲有同旨呈和Pony（蔡宝欣），主持周二晚《MM730》的《粉丝福利署》。

阿正表示能拍《胶战》，全靠现职ViuTV的商台旧同事向监制引荐，连试镜都冇就直接拍摄。她承认节目带给她好多意外收获，首先最惊喜是帮到电台节目，「好多人话睇咗《胶战》觉得我个人好癫，想听返我嘅节目，又有人话为咗我订咗商台个重温plan，系好神奇同好感恩。」爆红后粉丝落力支持，她觉得好神奇，「呢班人超级偏门，哈哈！几锺意你先会整应援，我哋可能素未谋面，都可以锺意到咁，好多谢！」

阿正跟《胶战》其他成员，以组合身份出席《Chill Club颁奖礼》。

阿正在Jeffrey和珈其中，竟然会拣珈其做对象。

阿正强调并非外貌协会会员，以往最锺意戆直男仔。

拣对象唔会拣Jeffrey

21岁才初恋的阿正，之后只拍过一次拖，她承认恨脱单，无奈入行后更难认识异性，「风水师父算到我起码要31岁先有桃花，呢两年可以专心工作。」要阿正在《胶战》4子中拣一个做对象，她首先淘汰Jeffrey，「真心问过自己一万次，Jeffrey系一定唔会拣，太细路仔嘞！如果24小时咁照顾佢，我应该搞唔掂。我会拣珈其，我锺意啲搞笑嘅，珈其有个好强嘅特质，佢真系好锺意讲嘢，Off机后keep住讲啲得意嘢同大家分享，黐住呢个人，唔会觉得闷。」至于Edan都系做朋友好啲，「佢喺镜头前好风趣，但镜头后比较理性化嘅人，有时同佢讲啲八啩嘢，佢只系『哦，系呀！食咩一阵间』，我成日话佢冇泪腺，佢唔系冷血，系对好多嘢都好冷感，不过同佢做嘢或者玩系好开心，但要佢好专心听你讲一件心事，佢未必hold到咁耐。」

阿正话Edan做拍档和朋友一流，做男友嫌太理性。

阿正视森美和小仪为偶像，入商台有机会跟两人合作《早霸王》，好梦幻。

多咗家用阿妈劲好餸

阿正读书时爱听电台节目，一直视森美和小仪为偶像，梦想可以做电台工作，甚至有机会做同事，所以当她离开了DBC，去了制作公司，梦想幻灭搞到情绪出现问题。直到有机会加入商台，就算人工不及前公司，阿正仍坚持追梦，「劲开心，但唔知点同阿爸阿妈讲，系低过毕业第一份工作。」阿正当时有谂过作大啲人工，「作大啲要畀多啲家用，嗰个开心系掩盖咗人工嘅问题，一返工拎咗个职员证跟同事讲『唔好意思我去一去洗手间先』，拎咗入厕所打咭，又去咗天台打咭影相，搭小巴话商台有落劲兴奋，嗰种开心同之前焦虑系两个状态，嗰吓乜都值。」

阿正攞住商台工作证，即入厕所打咭。

多得正爸同正妈支持，令阿正可以做自己喜欢工作。

近期成为广告红人的阿正收入多咗，「冇正式统计过有冇七位数，未买到楼，但家用畀多咗阿妈，笑容都宽松咗，餸又愈嚟愈好，有一期我阿妈烚蕃薯烚菜同埋鸡胸畀我，呢排好咗有脆肉瓜炒猪肉。有次去Hillary（刘沛蘅）屋企食饭劲好餸，我话自己日日食啲烚鸡胸冇味，佢妈咪话『你个餐单好似我日日畀只狗食』哈哈！」阿正坦言父母好支持她入行追梦，初入商台时人工低，她曾跟家人讲过若27岁未有成绩就转工，平时唔多出声的正爸却话：「点解要27岁就放弃，锺意就应该坚持落去。」当时食紧饭的阿正好感动，「差啲忍唔住喊，其实佢由细到大都冇乜点赞我，上次返去同佢食生日饭，佢又突然话『我冇乜讲呢啲嘢，我觉得你真系好叻』搞到我好怕丑，唔敢望佢扮听唔到夹餸。」