独家丨张伟文失智严重老人院撼头埋墙确诊后「与世隔绝」唔开心

2022-05-18 02:30

张伟文今年2月确诊新冠肺炎送院，一度传出病危，幸3月底康复出院。上周一(5月9日)张伟文举行网上演唱会，为7月20日沙田大会堂个唱补场热身。不过，因为住院及康复期间「与世隔绝」一段长时间，据知张伟文嘅失智症愈来愈严重，试过喺老人院撼头埋墙，经理人方俊话，唯一唱歌令佢记忆返晒嚟，即刻开心晒。采访：方骞平

方俊明白对张伟文要有耐性，就算对方猛扭计都会悉心照顾。

彩排期间张伟文突然黑面，方俊握实佢嘅手加以安抚。

69岁「靓声王」张伟文上周举行康复后第一个线上演唱会，虽然愈唱愈强，但受背部巨形压疮困扰，又痕又痛，而且出院后失智症变得严重咗，当晚演出前好似小朋友咁多次扭计，要经理人方俊及助手呵完又𠱁，送汤兼递上张伟文至爱汽水先搞得掂。

最后叫助手送上张伟文最爱嘅汽水，并推他出厂小休。

黑住面猛话好惊

《头条日报》现场直击，方俊对张伟文照顾周到，彩排前先安排他「医肚」，除送上自家炮制名贵补气药材汤外，仲有星洲炒米、贵妃鸡等美食，不过，伟文只对汤水情有独锺，扭计话：「星洲炒米好油冇益，鸡肉唔好食…」彩排期间再发脾气，黑面大声话：「好惊、有啲尴尬、死喇我一嚿云唔记得晒啲歌词…」方俊只好紧握佢双手加以安抚，仲出埋汽水嚟𠱁佢笑，加埋现场工作人员打气及掌声鼓励，一小时嘅直播最后都能顺利完成，虽然做Live时张伟文依然话好惊，但就愈唱愈好，尾段演绎《戏凤》时有埋造手，完Show后亦终于有返笑容。

方俊当日亲自为张伟文扮靓。

方俊边唱边拍张伟文的肩膊打气。

Online Show最终大功告成，张伟文即笑返晒，好支持伟文嘅赞助商「虫草大王」陈恩德亦有嚟探班。

体重已追加25磅

对于大病初愈后嘅表现，张伟文唔多满意：「我唱歌梗系冇嘢啦，但我好惊喎，呢类形式演出对我系有压力。」至于目前身体状况，张伟文话自己冇唔舒服，唱歌运气冇问题。方俊指张伟文出院后暴瘦咗50磅，𠵱家追返25磅，饮完补汤血气好咗，至于背部嘅巨形压疮，因为伤口溃烂令张伟文剧痛，之前已带佢睇皮肤专科医生，服用抗生素治疗，𠵱家最大问题反而系张伟文嘅失智症。

张伟文一时笑一时嬲一时喊，𠵱家状态都几「跳掣」。

用野生当归、党参、北芪等煲成嘅乌鸡瘦肉汤能提升血气，方俊日日送汤水。

张伟文死过翻生出院，翌日拍答谢片时要姚炜帮佢按摩。

掟嘢被院友投诉

今次做直播网民力撑张伟文，但难免有负面声音，方俊有话要说：「啱啱收到老人院电话，话伟文呢两日思绪好混乱，除咗大力用头撞墙及拍打牀板自残外，更掟嘢到隔离牀被院友投诉，院方即安排佢调床位，同时建议我快啲带佢去医院调药。唉！张伟文喺疫情期间长期被困护老院及医院，因为一段长时间少咗同外界接触，导致精神及反应比较迟缓，今次出嚟成个人呆哂，失智症愈嚟愈严重，所以先安排佢做直播，等佢生活上有啲寄托，兼且训练吓脑筋，佢最锺意唱歌，一埋位就enjoy地唱，特别系开个唱。」