古天后日志｜港股乏成交配合 反弹之路阻力重重

5月31日，天气炎热，部份时间有阳光，间中亦有阵骤雨，初时局部地区有雷暴。隔晚美股休假，欧洲股市做好。虽然美股休市，未为港股带嚟指标，不过市场资金及投资情绪有所好转，较早前因为stable coin暴挫而拖累大部份虚拟货币急跌，但呢几日虚币市场开始振作起嚟，比特币跟以太币急升，反映资金倾向risk on，利好美股进一步反弹。

虽然美股反弹势头持续，中港股市亦跟随向上，不过两地资金未见积极入场，噚日港股成交只有1288亿元，北水更录得净流出，明显资金唔多愿意喺21000水平再追货。不过阿爷继续发功，十万人参与嘅视象经济会议先声夺人，只系未见有具体政策公布，，市场仍关注国务院33项「稳经济」政策几时正式出台。留意今日内地将公布较重要嘅经济数据，将反映内地经济增长及通胀情况，料对中港两地股市走势有一定影响。

现水平入场值博率有限

港股喺欠缺成交配合下，呢一轮反弹浪可以走得几远，古天后睇法相对保守，重磅腾讯(00700)、美团(03690)跟阿里巴巴(09988)沦为大户舞高弄低指数嘅工具，呢个情况系美团身上最为显著。作为重磅蓝筹股，即使未有任何公司相关消息，其股价每日波幅可以达3%至5%，实在教人无所适从。不过明显地腾讯喺呢一轮反弹浪中，表现已跑输美团，而阿里则一向积弱，几时可以重拾红底股身份成疑，港股喺塘水滚溏鱼之下，反弹之路并不平坦。要喺个股之中发掘机会更加系难上加难，呢个亦系无乜资金愿意入场嘅原因。

恒指喺21200至21400水平阻力唔细，现水平入场嘅值博率有限，但碍于美股反弹力度不俗，港股呢边亦难以进取地做淡，目前只能步步为营，以观望为主。现货方面，之前喺20000楼下有低位捞货，亦系时候减磅套利，等待下一次较佳嘅进场点。

古天后

(徐狄怡，证监会持牌人)