古天后日志｜反弹浪接近尾声 减磅套现静待下次入市机会

6月8日，多云，有狂风雷暴及骤雨，有时雨势颇大，未来几日不稳定天气持续。美股隔晚反覆做好，仍然离唔开日升日跌格局，喺现水平上落，三大指数已逼近阻力位。美国联储局已开始缩表，只系喺目前市场资金仍充裕嘅情况下，流动性并未受影响，上市企业目前仍有资金进行回购，只系继续收水嘅话，流动性或迟啲会受影响，咁现水平再入市追货值博率已唔大，美股去到呢啲位都系食花生等机会。

嚟紧美国将会公布CPI，预咗通胀数字仍高企，但市场有乐观派表示，通胀有机会见顶，美联储局未必再进取地加息。不过从零售业嘅状况睇，高通胀已实实在在地影响咗零售市道，消费者因为物价高企而减少消费，而购买力亦大大减弱。

为咗去库存，零售商不得不减价，美国第2大百货零售商Target开始要降价去库存，持续落去就系毛利受损，唔排除零售企业嚟紧会被削盈利预测，企业本身对前照睇法亦会转趋保守。一旦下一季企业盈利继续走样，相信美股点都再有一轮调整。美股话已经走出熊市，暂时毫无说服力，只系熊市反弹以相当凶狠，咁就不如耐心等待下次入市好机会。

至于港股继续喺成交薄弱下反弹，虽然由20000边反弹至现水平，升幅已超过1500点，技术指标亦开始反映港股已进入超买水平，只不过喺衍生工具影响下，大量熊证喺22000水平结集，大户要再挟升指数去杀熊，似乎不费吹灰之力。

值得留意沽空力量已开始减退，大市向上就少咗沽空冚仓嘅力量，呢一轮反弹逼近22000-22500水平，应进入尾声，现水平虽然未可以贸易加入淡军行列，但再追货值博率大减，倒不如检示手上组合，有需要减磅调整，增持现金再等下一次调整入场。

古天后

(徐狄怡，证监会持牌人)