独家丨七师傅唱笑会耍全港独家「狗吠鞭」狂执MIRROR二摊拍广告

2022-07-13 02:00

54岁嘅七师傅(七仙羽)处女下海，将于8月12及13日在九展举行《师傅七都识唱笑会》，虽然喺一票难求嘅MIRROR演唱会后开Show，但佢唔担心票房，因为背后有「镜粉」支持：「我系镜仔『二摊王』！执过好多佢哋手指罅漏出嚟嘅广告，镜粉抢唔到偶像嘅飞亦会转嚟搞我，所以我啲飞好抢手。」更扬言炒价高达万元一张，最后佢作出呼吁，「大家要买就趁手。」采访：方骞平摄影：沈健程发型、化妆：Gaby Lai 场地：圆山台湾料理

七师傅唱笑会门票分三个价钱，最贵卖777元。

七师傅指，7月7日优先预售反应好好。

首次拥有自己嘅舞台，七师傅坦言好意外：「作为师傅每日主要系念经及修行，从来冇谂过登上舞台唱歌及跳舞。」问到由玄学家变成艺人系咪好有成功感？七师傅竟然话冇乜，她语带坚定解释：「因为我一早经已成功咗，我个人容易满足。其实呢个Show畀大家玩吓、开心吓啫，不过因为唔系免费，啲人会有期望，所以要做好啲，但冇乜压力。」她表示Fans要求佢唱歌、跳舞同埋着少啲衫：「夏天着少啲衫冇问题，不过我唔识唱歌及跳舞，交由导演拣啲『饮歌』等佢自肥。」

七师傅唔担心唱笑会票房。

为了表达唔同形式嘅「师傅爱你」，七师傅喺唱笑会宣传海报中化身多个造型。

七师傅去年夺「风云人物」奖，她承认自己早已成功。

唔敢对张敬轩耍「狗吠鞭」

今次唱笑会「主菜」系唱歌、跳舞及栋笃笑，七师傅度紧一道「甜品」益大家：「因为喺《七救星》中耍过嘅『闪电7连鞭』经已Out咗，到时可能会玩更难嘅『狗吠鞭』。」师傅愈讲愈兴奋，讲到绘形绘声：「呢门功夫好Hit，有好多艺人练紧㗎！佢冇正常嘅拳法，耍拳时会好似癫狗咁，唔知几时出拳，会突然扑上前咬你一啖，所以唔可以同观众集体练拳，万一我咬你，你咬我咁点算呀？」当追问有咩艺人练紧时？七师傅即改口补充：「「狗吠鞭」又叫「癫狗鞭」，我成日上网发掘全世界嘅新嘢，见其他地方嘅人练，但香港就未有人识呢样嘢，除咗我，呢个鞭法会出奇不意，连精神病患者都惊，到时可能会加啲创意落去表演，但我都要谂吓，费事啲人话我傻。」

七师傅喺《七救星》中耍过嘅「闪电7连鞭」已out，唱笑会中有机会玩更难嘅「狗吠鞭」。

追问佢会否向「下世老公」张敬轩耍「狗吠鞭」时？七师傅忍住笑继续说：「我唔好意思，万一咬错部位点算呢？师傅唔呃人，呃咗佢嚟，然后咬佢一啖，第日佢唔会再嚟，我要放长线钓大鱼喎。」

七师傅强调同轩仔仲未讲掂数，未确定系咪做佢「下世老婆」。

「下世老公」轩仔喺社交网中力推七师傅唱笑会。

为镜仔念经祝开Show顺利

另外，7月7日优先预售反应好好，七师傅听闻炒价去到7000几蚊一张：「我啲朋友、徒弟都买唔到。」她估计明天正式开售时会炒至过万一张。她又说，「因为镜粉同MIRROR影唔到合照、扑唔到佢哋啲飞就会嚟搞我...」师傅近两年接咗60个广告，她坦言：「有啲MIRROR冇期拍，广告商都会转軚搵我，我唔介意执佢哋唔要嘅嘢，我执完咪去做善事帮吓人罗，但都会同MIRROR念经做功德，希望佢哋红馆演唱会顺利同埋身体健康。」问到有几多广告系执镜仔二摊？师傅突然失忆：「唔记得」。最后，七师傅自爆几个月前开始做定准备，向一班生意人朋友扑到过百张MIRROR演唱会飞，为镜粉代劳。