独家丨谢安琪陪额伤囡囡缝6针声都震晒　探访家舍深刻体会病童父母感受

2022-07-14 07:00

谢安琪（Kay）最近为「麦当劳叔叔之家慈善基金」奖券义卖活动，担任星级义工队长，日前她到「麦当劳叔叔之家」探访，除带《星岛头条》记者参观家舍环境外，还陪患有脑肿瘤的6岁小妹妹阿怡讲故事及填颜色。由读书开始已热心做义工的Kay，表示做了妈咪后，见到病童感受特别深，她又自爆早前细女张靖（Karina）跌爆额头，她陪囡囡缝6针时成身震晒，心痛感觉令她好难忘。采访：杜杜摄影：沈健程

Kay为「麦当劳叔叔之家慈善基金」奖券义卖活动，担任星级义工队长。

Kay大赞「麦当劳叔叔之家」的家庭房设施齐全。

当日，Kay先详细讲解家舍的设施及环境，希望令更多人了解这个地方，「爸爸妈妈可以同小朋友一齐，喺接受治疗期间互相照顾，小朋友康复期间，家人支持好紧要。」

家舍的厨房好大，Kay笑指经常探访都会闻到香味。

小读中学已做义工

Kay对家舍相当熟识，因她多年前已为慈善基金担任过宣传大使，之后更经常跟老公张继聪去探访，「除咗探访，仲会喺新年前嚟派利是，嗰种支持唔系好物质，真系想将祝福好直接送畀小朋友同佢个家庭。」入行后经常参与慈善工作的Kay，早在中学阶段已是学校义工团成员，「会去医院长期病患病房，唱歌畀啲小朋友同老人家听，喺佢哋牀边同佢哋倾吓偈，入行后，作为歌手参与活动会得到多啲人注目，发挥力量更大，更加要做多啲。」

2012年，阿聪探访「麦当劳叔叔之家」时大受小朋友欢迎，齐为他除去手上纹身。

Kay向阿怡大讲「家Fun熊」的故事，听到阿怡入晒神。

探访期间，Kay先送上「家Fun熊」给阿怡，再跟她讲故事、填颜色。阿怡开心表示：「好锺意同Kay姐姐玩。」记者跟阿Kay访问期间，阿怡亦全程陪伴在侧。做了妈咪的Kay，面对病童时更能体会病患父母感受，她自爆几个月前细女Karina不幸撞伤要入院缝针，令她吓餐死，「个女喺出面玩时跌亲，额头破开咗，流咗好多血同伤口好深，我当时揸紧车去搵佢哋，谂住汇合一齐去食饭，但打极电话都冇人听，原来佢已经流血流到个人苍白晒，等紧救护车，咁细个伤口都缝咗6针。」

阿怡全程陪住Kay做访问，期间更好快手完成填色。

Kay跟阿聪育有15岁长子张瞻和5岁细女张靖，她庆幸两个小朋友都冇乜病痛。

赞张继聪「神队友」

Kay说当时只是故作镇定，手同把声都震晒，「嗰刻你一定要畀支持小朋友，佢嘅最大力量嚟自你，我只手扶住佢都要叫自己唔好震，其实好想喊，把声震晒，喺佢缝针期间仲同佢讲笑，其实好难做到，但系一定要做到。」好彩她身边有个「神队友」张继聪，「我哋好似唱双簧，佢喺呢方面都好叻，口才了得过我，阿女都好叻，缝完针唔痛，最终仲返到间餐厅食饭，竟然处理晒件事，啱啱到我哋张枱，小朋友仲好肚饿𠻹！」虽然囡囡只是皮外伤，亦好快冇事，但已令Kay心痛好耐，「呢个经历好难忘，自己流血都唔觉得咁痛，阿女之后已经冇嘢，但系唔知点解嗰个礼拜我个心好翳，每次一谂起佢整亲个场面，即刻好头痛。」

Kay跟囡囡关系好好，经常一齐玩黐到实。

Kay澄清囡囡其实都好锡老公阿聪，只是冇表现得咁明显。

阿怡趁着Kay访问期间，已将一幅画填好色，令Kay好惊喜，大赞她好犀利完成了满分作品。见Kay好识𠱁阿怡，看来是平时陪仔女训练有素，问她𠱁小朋友咁叻，会否令老公被比下去，所以经常在社交平台呻囡囡黐妈咪？Kay就解释囡囡好识睇人，「个女系知道我脆弱啲，佢会就我，会特别锡我，表达得明显好多，佢唔系唔锡爸爸，佢只系知道点对爸爸都系笑笑口㗎啦！佢系有啲小聪明，对我嗰种唔系分锡边个多啲，而系知道我哋性格唔同。」