独家丨JW赞朱敏瀚EQ超高电话畀陈滢抛落海冇发嬲

2022-08-19 08:00

JW（王灏儿）和朱敏瀚（朱仔）最近齐挑战演古装剧《痞子殿下》，两人坦承外形关系冇想过有得拍古装，JW更爆朱仔一度对她完全冇信心。两人又指跟陈滢及周嘉洛合作后变知己，已跟监制倾开续集。而早前四人出海玩，陈滢意外抛了朱仔电话落海，但朱仔竟然冇发脾气，获JW大赞超高EQ。采访：杜杜摄影：罗安强　发型：Leoyiu@Mplus salon(朱仔)　化妆：Chloe Yu(朱仔)　服装：brooksbrothers

JW和朱仔高度虽然差一截，但演情侣一样衬到。

JW曾表示签TVB其中一个目标是拍剧，但她估不到会拍到古装，「好多谢珍姐畀呢个机会，冇佢应该冇乜人会考虑我哋两个拍古装，我哋个样系比较难。」朱仔自2011年在《洪武三十二》做过马德钟少年版后，都未试过拍古装，「我连跑龙套都冇，以为自己同呢件事无缘。」

JW爆朱仔最初对她演出冇信心，但后来两人变得合拍。

朱仔对JW演出冇信心

不过JW竟然大爆最初朱仔对她完全冇信心，「我第一次见佢系围读时，佢系比较cool，个表情好似系『我都唔知你得唔得』咁嘅感觉，但系有礼貌嘅。」朱仔听到尴尬话，「我有个咁嘅感觉喺个心入面，哈哈！但系佢好快将呢个隔膜打破咗，由围读、训练、吊威吔，到拍咗一、两日，佢完全将我对佢系歌手嘅印象推返晒，我都即刻同佢讲，佢好应该将呢一面骚畀大家睇，大家会好锺意，佢对每件事都好认真，对每个人都一视同仁，系我哋呢班人入面好重要嘅灵魂或者开心果。」

JW和朱仔都话估唔到，会跟陈滢和周嘉洛能极速变好友。

JW和朱仔笑指，现在出海都想畀部电话陈滢，因可换新款电话。

朱仔和JW解释因跟陈滢和周嘉洛都是古装新丁，大家同甘共苦变成知己，私底下更不时相约出游。而陈滢更跟本刊透露早前去玩时，遗失了朱仔好重要物品，他反应证明品一流。见记者提此事两人劲兴奋，朱仔说：「佢同你讲呀，咁我讲啦！我呢部电话系佢送嘅。」原来四人一齐出海玩直立板时，陈滢帮朱仔影完畀返个电话他时，竟然抛跌落海，但朱仔冷静反应令JW大感惊讶，「如果陈滢系跌咗我部电话，我唔会原谅佢，就算佢买过部新电话畀我，我好多嘢冇backup，唔见咗系会发癫，但系佢『唔紧要，由得佢啦！」好高EQ。」