古天后日志｜港股借中概审计消息反弹无奈遇上美股插水

8月29日，大致多云，有几阵骤雨，局部地区有雷暴。美股上周五急跌，鲍爷放鹰，道指上周五跌1008点；标指跟纳指分别跌141点及497点。鲍爷上周五喺Jackson Hole会议大肆放鹰，强调稳定价格系联储局责任，同时亦系经济基石。佢老人家话更高嘅利率，虽然会令为大家带嚟痛苦，并令到经济增长放缓及劳市场转弱，但有助降低通胀，为咗降低通胀，都只有付出痛苦嘅代债，因为价格唔能够恢复稳定，只会带嚟更大痛苦。

之前古天后都讲咗，虽然通胀似见顶，但仍然keep住喺高位，仍远远高于联储局嘅目标，市场憧憬联储局暂缓加息，甚至打赌明年减息，完全系过份乐观。加上近两个星期，美股开始鸡犬皆升，炒到啲四五六线股仔，已经叫大家提高警觉，音乐椅游戏嘅音乐随时停落嚟，结果上周美股就出现大逆转，资金明显由risk on转返去risk off。当美汇指数再度回升，资金再流入美元，眼见虚拟货币反弹见顶又回落，美股亦随之向下。而强美元对新兴市场嚟讲，带嚟更大压力，美股脚软，其他新兴市场表现只有更差。

港股都好难再下一城

中美双方达成审计协议，中概股会计底稿可存于香港，美方有权喺香港查帐，消息流出，中概股急升，夜期也一度急升500点至20700水平，但撞正美股插水大跌，港股ADR急升后回落至20158收市，较港股收市微跌12点。而黑期更重返20000水平，估计喺明日期指结算下，港股今日或于20000水平争持。

虽然港股想借中概股审计达成协议嘅消息挟返高啲，而上周四半日市，就借头借路挟上，淡友喺上周三一度狠沽至19200水平，但又未见再有沽盘追沽，大户就只有平淡仓反手挟上。不过整体成交仅得周四半个交易日叫做有啲睇头，喺成交薄弱下，再加上美股脚软，港股都好难再下一城。

古天后

(徐狄怡，证监会持牌人)