独家丨张伟文嬲爆反驳:碗饭好宝贵点解唔放过我声大大女歌手指坐轮椅唱歌「惨不忍睹」

2022-09-05 07:00

69岁「靓声王」张伟文（Donald）今年2月确诊新冠肺炎，康复后重上舞台，愈战愈勇。日前，Donald喺元朗大会堂补场演出，亦系《友情有义演唱会》最后一场，继续用泪水答谢歌迷嘅厚爱。对于Donald坐住轮椅开Show，反应两极，有位好有「份量」又声大大嘅女歌星形容系「惨不忍睹」，Donald激动反驳：「碗饭对我嚟讲好宝贵。」采访：娱乐组

张伟文回应坐轮椅唱歌好惨论，讲到咬牙切齿真系好嬲喎。

要经理人方俊及好友姚炜呵返。

新冠肺炎康复期间张伟文长期「与世隔绝」导致失智症变得严重，试过喺老人院撼头埋墙，5月初做网上演唱会时多次扭计发脾气。直至有得喺7月及8月尾，补埋最后两场《友情有义演唱会》，Donald才回复精灵状态，愈唱愈强。Donald唱完最后一场元朗show后强调冇失落感：「大功告成反而开心，除非好耐冇得唱先会迷失方向。」经理人方俊承诺为他争取演出：「只要有唱到嘅能力，有朋友支持佢，都会安排佢演出，不过如果再上红馆，都唔容易攞到期。」

姚炜为张伟文个唱复出舞台，张伟文坐在经改装的流动椅子在台上唱歌。

每场演绎《每当变幻时》，Donald都用泪水去答谢忠粉厚爱。

元朗大会堂系《友情有义演唱会》嘅最后一场，坐无虚席。

张伟文完骚后坐轮椅去谢票。

黑妹姐及肥妈嚟过后台探班。

Donald一直冇谂过可以唱到咁多场，好开心达成心愿。

坐住唱下身唔郁得

5年前张伟文受腰椎毛病困扰不良于行，要长住老人院，但仍自强不息唱歌搵食，唔要做废人，但对于他坐住轮椅都唱，亦有反对声音，甚至有位好有「份量」讲嘢大大声嘅女歌星，形容系件好可怜嘅事。Donald对「惨不忍睹」嘅评语有啲耿耿于怀，带点不悦回应：「唔得咩？好多人坐住都冇得唱，最少我有呢个能力，其实坐喺度唱唔容易，下身啫啫(指重要部位)唔可以郁，否则冇气。」在旁嘅方丽盈即为Donald解画，估计他所指，系要hold住丹田气。

环星娱乐老板张国林(右二)答应继续为张伟文开骚，方俊(左三)、方丽盈(左二)、姚炜(左一)都替张伟文开心。

冇能力去谈黄昏恋

变得好sharp醒嘅Donald续说：「无论我用咩方法唱落去我都系唱歌啫，如果欣赏我，请唔好加啲可怜目光去睇我，然后说三道四，我都系为搵食啫。」Donald愈讲愈激动，甚至咬牙切齿对住镜头说：「我梗系嬲啦，我剩番碗饭，碗饭对我嚟讲好宝贵，弹人做乜啫？得一、两份收入都唔放过我？我点样做系我嘅事，我锺意唱歌，锺意唱到老呀！」方俊见他咁火即呵返：「可能啲人未必了解啫，唔太清楚唱歌系佢精神支柱，所以如果佢状态唱得到，我都会继续安排佢唱，其实好多fans好锡佢，睇show之馀仲会送上平安利是，但佢身体要争气。」姚炜就鼓励张伟文多做运动，扶住企吓起身，唔好咁懒。