58岁吕方被2岁囡囡融化 凑女冧到爆又揽又锡系咁笑

前年，58岁的吕方做咗高龄老窦，太太伍惠宝（Rainbow）诞下Emma，由于身家丰厚，又家住元朗独立屋，吕方去年尾参加完内地节目《我们的歌》后基本上可以退休，全职凑女。

一家三口仲着晒亲子装添。

伸晒脷咁喂囡囡食雪糕。

因为老来得女，吕方自然锡女锡到燶。吕太放咗段新片到IG，片中嘅2岁囡囡喺屋企搵老窦，见小妹妹慢慢上楼梯，上到第二层，爸爸就出房门口迎接佢，睇吕方个笑样，隔住个Mon都Feel到有几甜。一开始，吕方张开双手揽囡囡，然后Emma拖住老窦落楼，老窦见攰坐低，同囡囡一齐拍打大髀，去到转弯位，老窦就狂揽囡囡，又同囡囡面贴面，Emma好活泼，锡完爸爸面再锡嘴嘴，氹到吕方咭咭笑。

另外，吕太不时分享凑女之日常，最新有带囡囡去打第一针疫苗，仲狂赞打针过程冇得弹，因为政府网站预约好容易喎。「 今日星期日，人会比较少啲， 由泊低架车 （车位就真系太少）， 每一个位置都有人带领住我哋， 完全唔需要等，好轻松就带到Emma坐低打针。原本我都有啲担心， 惊控制唔到小朋友会扭计， 点知沿途啲卡通气氛＋贴纸， 令佢完全意会唔到有哥哥即将要拮佢针🙈 最令人惊叹嘅系护士哥哥一边同佢倾计， 0.1秒之际就拮咗支针落去大髀，Emma 望一望自己只大脾， 竟然好似若无其事咁继续玩张贴纸😂😂😂 我同工人姐姐O晒嘴 （互相对望）， 欣然行去等候区。 惊喜陆续有嚟， 等候区有个扭波姐姐送每人一个扭扭波， Emma 欢喜若狂， 好大可能佢好想快啲再嚟打第二针。」吕太仲话Emma好叻 ，因为打完之后完全冇唔舒服，唔知以为广告添呀。

囡囡打第一支疫苗。

收到波波好兴奋。

小朋友真系好易满足。

另外吕太仲有分享囡囡同狗仔玩嘅片，又有可爱瞓觉样同去公园玩嘅相，最过瘾系杜德伟带囝囝AJ去探37年老友吕方，5岁AJ轻揽2岁Emma影合照，好似迷你版杜德伟跟Mini版吕方咁，好鬼得意呀。 

囡囡同妈妈养嘅狗狗好好感情。

一齐喺后花园玩。

有时间就出去唞吓气。

老窦视角。

吕太好锺意影囡囡瞓觉。

杜德伟带囝囝去探吕方，两家人嘅小朋友影合照，好似迷你版杜德伟跟Mini版吕方。

 

TEXT:SW

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ