独家丨陈晓东首爆老婆唔生第三胎原因最衰本报 最爱教女用广东话讲核突嘢:食屎嗰啲
2022-09-09 07:00 
陈晓东因疫情已有两年多冇返过香港，因为出广东歌《这种年纪》，及为10月举行的首个户外骚做准备而回归。他笑指老婆王妤娴为𥄫住佢亦有同行，而刚满47岁的他仍未出现中年发福，他指老婆较他更Fit，更笑言老婆发奋操靓Body，因本报的一次陈年报道。可能太耐冇用广东话做访问，东东全程Keep住兴奋讲笑Mode，仲爆笑称自己忙做访问，而老婆就用佢张信用咭努力Shopping，咪以为佢呻呀其实晒紧幸福。采访：杜杜 摄影：谭志光
东东跟太太王妤娴和两个囡囡陈芷霖（Kathelyn）和陈芷怡（Katheryn）近年定居北京，以往他会经常返港探妈咪，东东坦言真系好挂住，「喺北京冇人同我讲广东话嘛！我净系教小朋友讲核突嘢，佢哋呢啲年纪系锺意讲食屎嗰啲，𠵱家全屋人都用广东话叫我大佬，好好笑！」
刚踏入47岁的东东，心态同外型都完全唔似将近半百，新歌《这种年纪》好似话中有话，「原本歌词有多啲无奈，写到好唏嘘，好似我就嚟退休咁，哈哈！」东东承认心态上想转变，想跳出舒适圈，「以前我可能唔敢唱呢个主题，大家睇社交网觉得我好后生，系咪专登扮到好细呢？我谂呢个主题几得意，就同填词陈咏谦讲咁写，证明我唔惊咪唱罗！」歌曲主题够胆试新嘢，东东连10月首个户外演唱会，也跟19年的第一次红馆Show做法好唔同，「上次自己写晒Rundown，今次我大概度咗个框架，再由导演写，想唱多啲广东歌，多啲集体回忆同新意，会将啲歌重新编排，因为想同观众一齐玩，互动多啲。」
主动提供老婆行踪
9月3日牛一的东东表示保养方法就是做住家男人，减少应酬就可以少饮酒捱夜兼可常做运动，他又自爆太太较他操得更Fit，原来全靠本报一篇陈年报道激励，「上次返嚟，畀你哋影咗佢，明明冇第三胎，话佢疑似有第三胎，嬲到佢呢！老公着到咁有型，佢着到咁，跟住佢碌咗我几多咭你知唔知呀！？哈哈！碌爆晒啲咭，之后佢好努力keep，瘦返晒梗系唔肯生第三胎。」问东东想唔想再做爸爸，爱妻号的他就交陈太决定，仲继续爆太太今次有陪他返港，仲继续狂碌咭，「𠵱家碌紧啦！你以为我喺度做访问，佢喺屋企等紧我煮饭呀？！好难嘞！你去海港城捕佢啦！实撞到佢！我出嚟之前佢问我张咭系咪冇限额，我话得啦！哈哈！」不过东东事后兜返，因为难得返港，加上好多朋友都是九月之星，陈太主力是帮他买礼物。
囡囡私人数学老师
东东一提太太就好兴奋，讲到分别七岁及六岁的囡囡亦一样停唔到口，「佢哋好乖，太太亦都好识持家，所有嘢都系佢搞晒。」虽然有佣人帮手，但东东赞老婆所有囡囡的事都亲力亲为，而他就主力检查功课兼任数学补习老师，「数学系我强项，屋企有电子黑板，我会写个乘数表出嚟，食紧饭我都会问佢哋，譬如五、七，佢哋答三十五，我会再反过嚟七、五，乘数表系口诀加概念，点解我要食住饭嚟问？就系唔想佢哋数，要直接讲出嚟。」东东教数学好认真，检查功课发现做得唔好会全部擦晒，但他强调绝非虎爸，会让小朋友游戏时游戏，「我会佻皮啲，叫佢哋星期日唔好练琴，要玩、陪我行街，仲叫老婆暑假唔好安排佢哋上咁多堂，带佢哋去三亚睇海豚，我锺意带佢哋亲身去睇。」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应