独家丨林明祯自爆大马住惯几千尺豪宅狂拍广告储两年钱在港买大屋

2022-09-23 06:30

「大马女神」林明祯近年凭靓样好身材，已接拍近10个不同类型广告，被捧「广告女王」的明祯，最近再有吸金机会，首度帮食肆拍广告，食住小笼包和拉面大卖甜笑。一直想在香港买楼的她，虽然口密唔公开吸金能力，但承认目标要买大屋，更唔觉意自爆在大马家乡住惯几千尺豪宅。采访：杜杜摄影：朱伟彦　场地：翡翠拉面小笼包

着住贴身紫色连身裙大晒fit爆身材的明祯，斋甜笑已经好吸引。

明祯扮同朋友聚会，睇佢演得几投入。

明祯话本身同屋企人都是小笼包粉丝，平日在家乡已经常食，今次拍广告更加可以放纵任食，而出名锺意食咖喱鱼蛋的她，更向师傅建议新口味的小笼包，「头先我同师傅讲，佢整嘅小笼包好味又好靓，所以建议佢放啲咖喱鱼蛋，或者咖喱鱼蛋嘅汁落去试吓，嗰种味叫明祯小笼包，我谂一定会好多人食罗！」追问她当时还大胆话如果师傅肯整，可以免费帮手宣传，佢即尴尬笑话：「如果佢真系整个明祯小笼包嘅话，我会考虑嘅，90%冇问题。」

明祯是小笼包迷，睇佢揸筷子可以夹唔穿就知食惯。

为食的明祯，见到碗面竟然忍唔住偷食。

未够胆唱广东歌

一直恨在香港置业的明祯，拍埋呢个广告应该距离香港「上车」又近一步，「我没有算钱，还不敢算，今年结束才好好计算一下，我梦想买好大间屋，但𠵱家仲未会买住，因为自己仲有好多时间可以赚钱，想再畀自己多两年时间赚钱，睇吓我嘅业绩去到边度。」不过明祯承认因为马来西亚住几千尺豪宅，所以要买就买大屋，「我想前面睇到海，背后有山，我妈妈应会好锺意，因为马来西亚地方好大，我哋屋企都好大间，所以我嘅屋企人都习惯咗。」

明祯话大马屋企大，真系唔系讲笑，在花园做瑜伽零阻碍。

呢个角度再睇，明祯大马屋企花园瞓咁多人仲有好多空间。

明祯一家在大厅同细佬庆祝生日，睇到有埋车房泊车。

早前明祯离开香港到台湾，原来是为了明年初推出的首支单曲做准备，「我希望有一个自己嘅作品可以同大家见面，𠵱家都努力紧做一首歌。」广东话愈来愈好的她，有冇机会推出广东话？她即好无奈咁话，「面对面嘅时候大家都话『你嘅广东话好好，听得明』，但背后都会话佢讲紧乜呀？哈哈！所以我唔知道我嘅广东话到底系点样，但如果唱歌嘅话，广东话真系唔系讲笑，一定要好正，所以𠵱家都唔系好有信心，因为我唔要唱好笑嘅歌，我要认真嘅歌。」