独家丨方力申唔争气老窦周街搵未来新抱同陈滢主动加咀戏惨被叶念琛Cut晒

2022-10-18 07:00

7年冇拍剧的方力申，今年拍了两套剧包括老友叶念琛的作品《美丽战场》，更跟绯闻女友陈滢首度合作，他承认同女方好熟，扮夫妻更有默契，甚至大贪到自动加咀戏搞到叶导嗌停。另外，42岁玩了一年交友App依然食白果的小方，自爆父母超心急饮新抱茶，方爸爸更紧张到主动为阿仔搵女友，举动吓亲全家相当爆笑。采访：杜杜摄影：朱伟彦发型：Kin Tam@ ILCoplo 化妆：Yen Lai 服装：5cm

小方在剧中饰演富二代「庞振宇」，人称「宇少」。

叶导之前接受《头条日报》访问提到，搵小方拍剧全因对方近年太少演戏，仲笑问他「系咪退咗休？」，小方承认疫情搞到演戏机会大减，「我都问自己，点解冇人搵我拍戏嘅？冇理由㗎！我曾经都系二千万票房《纪念日》嘅男主角，唔通我得罪人？疫情系最大关键，剧组又少咗好多，香港或内地度度都封，做戏、登台唱歌都有好大影响。」

近年小方多参与综艺节目，如《男神厨房开业喇！》。

小方近年除了幕前演出，亦积极参与慈善活动。

小方话唔明跟邓丽欣的《纪念日》都有二千万票房，但咁少人搵佢拍戏。

拍激咀戏似打烂仔交

叶导钦点小方拍《美丽战场》，后者的第一个反应，是因为他跟陈滢的绯闻，「佢净系话第一次嚟TVB拍剧，一定要我，但我开头好衰咁话，『你搵我都系因为我同陈滢传过绯闻』，佢都闹咗我一轮！哈哈！」小方再投诉听足叶导指示为扮富家子「庞振宇」做准备，专登减肥、唔健身、唔晒太阳，希望睇落白净瘦削啲，点知反被叶导闹，「佢又要我哋减肥，但每日又外卖又宵夜，我真系唔食㗎！嗰班女仔一啲自控能力都冇系咁食，我坐喺度就唔食，但系换嚟导演闹我，『你减肥唔食嘢就做唔到我要嘅感觉，因为你肚饿』。」讲到跟朱晨丽的激咀戏，小方表示拍摄时冇感觉，「拍嘅时候好快，成场戏十五分钟之内拍完，好短，大家见到就系咁多，呢啲戏其实好似动作戏咁，因为大家都唔知做咗啲咩，好似打烂仔交咁。」

小方大呻为了这个剧，都畀叶导闹过好几次。

预告有小方跟朱晨丽激咀戏，小方表示拍摄时太快所以冇尴尬。

至于同绯闻女友陈滢合作，小方承认沟通可以好直接，仲自爆两人主动加咗咀戏，「我要爆吓料，但系可能会畀人闹，我哋好熟做戏就好直接冇所谓，有啲戏我哋会蜻蜓点水咁锡。但系有一场讲我放工返嚟，好自然咁就锡咗一啖，第一个take OK，第二个take都系咁做，到第三个take 导演话其实呢场唔需要锡㗎喎！后尾就cut咗。」剧情虽然讲晒小方同陈滢由认识到离婚，但两人依然觉得对手戏太少，「我就真系觉得唔系好够，佢都有讲过，嗰时大家坐埋一齐无聊倾偈，讲到再拍多套会拣边个女主角，我话拣陈滢啦，因为呢套未够呀！」

小方跟绯闻女友陈滢首度合作，就合演夫妻。

小方和陈滢传出绯闻后曾上节目《Tiger's Talk》，仲玩埋合卺交杯。

择偶要合眼缘脾气好

单身5年的小方仲有玩交友Apps，仲大呻玩咗一年完全识唔到女仔，「梗系搵唔到啦！我边敢，都系得个讲字之嘛！讲过五句嘢都唔多过五个人，我add咗几个朋友，佢哋话唔好嘥佢quota，我当见吓陌生人咁样咋！男人有时都会弹出嚟，我好嬲呀，我明明拣女仔但有男仔弹出嚟，好彩几靓仔，我有啲朋友拍紧拖，都系因为我叫佢玩咋！」不过小方强调唔恨拍拖同结婚，「我真系唔需要拍拖㗎！睇我咁多年冇拍拖，我唔系一个咁需要谈恋爱嘅人嚟，我好忙好多朋友，成日全男班好dry。」

小方话今次同陈滢合作未够喉，好想再有合作机会。

42岁的小方承认父母有催婚，早前上节目见到苏民峰，方妈妈之后即追问他，「『佢有冇讲你几时有姻缘、桃花，几时会结婚？』佢几紧张呀！但我话唔记得咗咯！」而方爸爸更加主动出击周街搵未来新抱，「之前搭地铁见到个女仔让座畀我Daddy，嗰时仲未要戴口罩，佢有甜美嘅笑容，Daddy话好想同佢讲『我系方力申老窦，不如交换电话』哈哈！朝早去食早餐，见到啲好照顾老人家嘅职员，佢都想问对方有冇男朋友想介绍畀我识，但畀我阿妈㩒住咗，怕对方以为系Daddy想识。」小方话拣对象冇特定标准，合眼缘兼脾气好就得，虽然他希望另一半是圈外人，但承认自己生活圈子太细，「我当然唔希望畀人讲咁多，亦唔希望我嘅另一半要畀人讲，但我又唔出去约人，可能最后尾另一半都系合作嘅朋友、同事。」如果大家有好女仔介绍，不妨上社交平台PM小方啦。