古天后日志｜港股一浪低于一浪形态未变

10月21日，美股隔晚表现反覆，英国首相请辞，成为英国史上最短命首相，早段美股因为呢个消息高开，其后又有储局官员鹰，美股调头向下，三大指数最终倒跌收市。道指跌90点；标指受制3800阻力，跌29点；纳指则喺11000点前止步，隔晚跌65点，报收10614。10年期美债息升至4.23%，科技股偏弱，之前纳指仲有啲龙头股顶住，但呢两个星期，苹果公司跟Tesla等已明显转弱，纳指亦倒水咁倒。下周四苹果将公布业绩，要睇睇业绩公布如何。至于Tesla股价喺跌穿265重要支持后走势向下，业绩公布后股价进一步跌至207再穿5月低位。由于电动车股一早已炒过笼，喺债息高企下，难免被杀估值，加上其生产线暂时已达到顶点，未来一两年难再持续高增长，面对64倍咁高PE，唔被杀估值已至出奇。SNAP喺业绩公布后，股价又出现急跌两成，睇嚟今次业绩期，美股未能藉此翻身。不过当重磅龙头股都杀到猪头咁款，美股跌浪就有机会进入尾声。

至于港股噚日午后由低位反弹，早段下试16000心理关口，16000好友力抗淡友，再借内地可能放寛隔离政策而挟升，日前已有内地航空公司准备复飞国际航班，呢个消息可能有机会好快宣布，空穴来风必有因。港股噚日挟升成交回升至1268亿元，但要睇跟住呢几日，成交系咪可以维持喺1200亿元之上，如能持续有资金流入，先有条件见底，不过16000呢啲大位都要尊重嘅。不过港股喺呢半年，成交持续萎缩，变成弃婴一样，日日阴乾，一浪低于一浪形态未变，反映买家已无心入市，就算有反弹，持货者都只系想趁机走人，散户亦无心恋战，唔多愿入市，至于内地喺二十大开幕时，已强调动态清零方针不变，即使放寛隔离政策，一日要搞隔离，无论几加几都好，当全世界已复常，中国仍然集中火力抗疫，实在难与世界接轨，咁嘅情况下，A股跟港股都系继续无乜运行。