独家丨袁剑伟曾为篮球蚀掉廿万积蓄 唔肯剧透《季前赛》激嬲细女
2022-11-09 08:00 
袁剑伟首次执导剧集《季前赛》反应相当好，自认本身才是篮球痴汉的他，不但搞到周身伤，早年更曾为篮球蚀掉近廿万积蓄，不过今次拍剧已一次过满足晒，开心跟一班年轻演员合作，更对他们有赞冇弹。太太林嘉欣和两个囡囡晚晚都有捧场，而细女更因睇得太投入而嬲咗爸爸。采访：杜杜 摄影：朱伟彦
剧中的「痴汉篮球队」，灵感来自袁导本身，「真正嘅篮球痴汉系我，自己个篮球group都系咁叫，打咗十几年都系叫呢个名，我拉咗啲编剧入group，佢哋就自然攞咗呢个名嚟用。」袁导对篮球的着迷，除了多年来搞到满身伤患，几个月拗柴一次外，最夸张是推出过篮球杂志，仲一次过蚀掉近廿万，「系NBA罢工嗰年（1998-1999赛季），出咗四、五期就罢工，咁就冇人睇篮球，我嘅篮球杂志就寿终正寝，自资咗十几廿万。」
借影帝梁朝伟做例子
《季前赛》播出以来，一班年轻演员演技获赞，问到他们有否需要改善的地方，袁导表示除了咬字同发声外，已想不到他们的缺点，「我自己系好爱呢班演员，成日谂佢哋positive，好少谂佢哋negative。」他坦言这个阶段鼓励更重要，「唔通要佢哋有影帝级演技咩，唔需要罗！佢哋喺呢个年纪唔系做咗咁多嘢，做到咁样都几超标。」他又以影帝梁朝伟作例子，「我睇返《北斗双雄》，呢套系我最锺意嘅TVB剧集，当时嘅梁朝伟都冇𠵱家嘅份量，但系会觉得佢好cute好好睇。」
袁导开心外界反应赞多于弹，不过都不及太太林嘉欣，以及两位分别12岁及9岁的囡囡，Kayla和Sofie睇得开心更有满足感，「我以前拍啲嘢佢哋唔睇得㗎嘛！哈哈！一家人睇系非常快乐嘅一件事，同埋睇到佢哋笑到卡卡声系好满足㗎！譬如河马嘟嘴嗰幕，佢哋笑到呢，又好尴尬唔敢睇，佢哋会问会唔会锡㗎？」不过袁导连家人都冇面俾唔会剧透，最后当然有后果，「我细女嬲我呀！佢话点解你集集最尾梗系吊住条尾，佢嬲我话『今晚瞓唔着呀！』」
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应