独家丨林俊贤对女儿「冇抚养论」伤心欲绝:佢伤害我前度斥林钰洧亲母大话精改名掩饰身份

2022-11-10 07:00

27岁林钰洧（Denice）当选应届港姐后，Denice亲母Jasmine突然蒲头指控前夫林俊贤系「狗男人」，男方唔想泼妇骂街，但眼见Denice加入「家事论坛」发表「佢(爸爸)冇抚养过我」言论，跟15岁的Denice相认后有月月「科水」的林俊贤欲哭无泪，语带伤感说：「我个女讲大话，系伤害我。」而撑硬林俊贤的前度Winnie亦踩行油搬出Jasmine黑材料，除改名掩饰身份，更怒斥女方为方便带男人返归而另租地方，安排13岁的Denice与业主share Apartment生活。采访：娱乐组

林俊贤虽然好嬲，但坚持个女系受人唆摆先咁做。

Jasmine同Denice多次改名，仲迫个女人前认系两姊妹。

Denice亲母Jasmine最近翻旧帐数臭林俊贤，包括迫她堕胎及要求女儿验DNA；又斥林俊贤冇诚信，缩沙唔肯共同抚养女儿，甚至指控被男方两度家暴打至脸肿，对此，林俊贤于微博逐点反驳。至于林俊贤前度Winnie及两人所生的儿子Selwyn齐齐声援；表妹冯镓潆（Naomi）也加入力撑，跟Denice 及Jasmine互轰，遍地花生。

林俊贤前度Winnie（左起）,Denice,林俊贤表妹Naomi曾经好老友。

林俊贤前度Winnie及两人所生儿子Selwyn齐声援爸爸，力证爸爸冇家暴及躁狂。

表妹Naomi力撑林俊贤，亦希望Denice慎言。

Naomi、林俊贤及同父异母细佬曾经好融洽，但Naomi同Denice已再冇联络。

个女讲大话伤害他

对于林钰洧出席活动时就父母争拗开腔回应，除嘲讽林俊贤年纪大善忘，唔记得验DNA事件外，再否认被爸爸供养过，对镜头表示：「佢冇抚养过我罗。」Denice的说法伤透林俊贤个心，他接受《星岛头条》独家访问时一字一泪：「如果讲返佢细个时，我有冇畀钱佢妈妈？佢唔知系冇错，因为佢妈妈可以同佢讲爸爸冇畀；但15岁以后嘅嘢，佢话我冇供养及畀钱佢，佢就系讲大话，唔单止失望咁简单，系伤害我，虽然咁多年嚟，我都畀人污蔑、中伤及背叛，但呢一次我个女系咁样讲大话…个伤害…我反而唔容许…」林俊贤讲完重点即封口，唔再争拗落去。

林钰洧日前公开「冇抚养论」伤透爸爸心。

林俊贤15岁后同囡囡相认都有供养她。

父母未分开时，林俊贤好锡Denice。

Denice作风大胆，被指系「性女港姐」。

Denice自当选后，亲母Jasmine突然爆陈年家事，令Denice成为话题港姐。

唔开心到彻夜难眠

表妹Naomi亦爆表哥林俊贤为咗呢件事，唔开心到食唔安瞓唔落：「任何人睇到新闻，见到个女咁讲都会唔开心啦，以我所知两父女系有联络嘅。」Naomi又强调母亲共有7姊妹，亦同林俊贤最close，以前她妈妈会去姨妈(林俊贤妈)屋企，带表哥返学放学，煮饭佢食，所以林俊贤嘅事，她们知得好清楚：「我都有了解佢心情先会企出嚟讲嘢。」问有否忠告Denice？Naomi坦言自从带佢入行，对方签咗Kim做经理人后再冇联络。「我觉得作为仔女，上一辈嘅恩怨，过咗去就算，唔好执著过去一啲唔开心嘅事，影响咗𠵱家事业，亦希望佢见传媒要慎言。」

Denice获表姑姐冯镓潆(Naomi)介绍入行做模特儿。

林俊贤畀个女激亲。

婚书改名掩饰身份

另外，Winnie亦忍唔住踼爆Jasmine系大话精：「婚书上Jasmine嘅名系叫Wendy，佢畀传媒嗰张系做咗手脚改成Jasmine，我记得当初认返Denice，佢系叫Denice Moore，唔系叫Denice Lam，Denice仲爆阿妈改多一个名，因为想有第二春要遮掩好多嘢，Jasmine又唔畀Denice喺人前叫佢妈咪，只能叫做家姐。」Winnie又爆初识Denice时，对方同业主share Apartment，「唔算住劏房，妈妈安排佢搬开系方便带男人返屋企，坦白讲，点会有业主肯租畀13岁小朋友独居？」据知正因为改名问题，林俊贤才迟迟搵唔返Denice负起爸爸责任。对于Jasmine黑材料，林俊贤表示只系想讲返事实，以正视听，更指Winnie所讲的就等于佢讲。