古天后日志｜港股下一步要挑战50日线

11月11日，早上时间多云，日间大致天晴。隔晚美股急升，道指升1201点；标指升逾半成，纳指更劲升7.35%。美股劲升原因系因为公布10月CPI降速较预期大，加上早前几日美股回调，令之前超买情兄得到改善，加上通常美股喺中期大选过后，情况变得明朗化，美股其后嘅升幅可以去到一成过外，如今通胀有望见望，美股之后嘅上升之路或会变得较为易行。目前标指已升穿3900阻力，下一阻力喺4100点，至于纳指亦升穿11000点，下一阻力系11300点。

美10债息回落至3.8%，一旦CPI降速继续加快，当通胀稳定，明年就有减息空间，以联储局嘅准则，只要息口高过通胀2%，而通胀稳定唔恶化，咁美息就有条件向下，呢个亦系10年债息喺10月份CPI公布后，回落至3.8%嘅主要原因。虽然近日美企大手裁员，但未出现倒闭潮，甚至唔少企业仍录得盈利，只系盈利有所下跌，或调低来年盈利预测，情况好过欧洲好多，以基本面嚟讲，美股系有上升条件。尤其喺大企业相继裁员下，就业市场未见明显收缩，反而有所扩张，失业率一直维持喺低水平，虽然高估值嘅科技股被狂杀估值，但当大部份高估值股份，已较高位回落七成或以上，个别优质股份，已届吸引及可收集水平。

对于美股，古天后系较为睇好，不过当美息见顶回落，美元回落，资金开始重返新兴市场，令中港股市由低位回升，之前提到港股由14600低位反弹逾2000点至16800水平，早两日再度回落至接近16000水平，虽然噚日万六关一度失守，但20日线仍企定定，都讲过只要20日线守得住，整个反弹浪未完结，仍有条件挑战17000/17500，甚至18000水平。今日预期喺美股急升下，港股将出现裂口上升，只要16800企得住，而又有成交配合，下星期港股就有条件挑战50日线。