世界杯2022｜专栏：阿根廷状态大勇「拉」唔住

世界杯开锣战，东道主卡塔尔输畀厄瓜多尔零比二，成为历来第一支主办国球队喺第一战输波。表现四个字形容：不堪入目！门将上半场连环「派胶」，下半场全队大部分时间更喺后场搓波，边路传中一只手数得晒，睇到我同主场球迷一样，颓晒。如果卡塔尔要出綫，真系要「奇迹」降临先得喇！

至于今晚就会上演阿根廷对沙特阿拉伯嘅赛事。今届阿根廷焦点一定落喺美斯身上，事关今届会系佢最后一次代表国家出战世界杯。呢位球王攞过无数荣誉，连咁多年都未再拎过嘅美洲国家杯都拎到，艾尔都想佢喺世界杯有个完美结局。

经过上届世杯嘅惨痛经历，阿根廷今届有种焕然一新嘅感觉，自一九年七月开始三十六场比赛不败，今年六月喺「南美欧洲冠军杯」净胜意大利三球，令艾尔印象非常深刻。
　
阿根廷前綫上，拿达路马天尼斯同迪马利亚表现对办，同美斯嘅融合愈嚟愈好，迪保罗、基斯甸罗美路、利辛度马天尼斯等防守亦相当硬净。前中后三綫球员发挥稳定，系艾尔觉得比之前改善嘅地方，亦系今届佢哋成为争冠热门嘅主因。

对手沙特阿拉伯再度打入今届决赛周，球队胜在有地利，适应高温问题不大。不过球队实力始终有限，对上一次可以分组赛出綫，已经数到一九九四年，上届分组赛更大败畀俄罗斯五球。

睇埋卡塔尔嘅表现，艾尔觉得中东球队喺世界杯嘅级数差一大截，沙特第一场就要对状态大勇嘅阿根廷，相信好难顶得住。艾尔呢场推介阿根廷让球阿根廷「-2」上盘，半场入球大细「1.5」大都可以考虑。艾尔

立即下载 | 全新《星岛头条》APP : https://bit.ly/3yLrgYZ