世界杯2022｜专栏：东洋武士有个X Factor

今晚德国对日本，系艾尔今届世界杯其中一个几期待嘅对碰。德国上届唔知系咪中咗衞冕冠军嘅「魔咒」，竟然喺分组赛排包尾出局，之后喺欧洲赛嘅成绩都麻麻。功勋领队路维十五年嘅执教要画上句号，并且由费历克接棒。

费历克喺德国队执教嘅头八场赛事全胜，但对手实力比较弱。今届德国喺欧国联面对意大利、英格兰同匈牙利，只能够攞到一胜四和一负嘅成绩，表现不似预期。上场热身赛对安曼更只能小胜一球，令艾尔觉得依家嘅德国仍未有番昔日嘅霸气。

「东洋武士」日本队上届喺十六强对比利时一度领先两球，但最后倒输三球，实在可惜。今届球队由森保一领军，「一哥」嘅保守风格令唔少日本队球迷几唔满意，今次更抽到同西班牙、德国同组，难免会令人担心出唔出到綫。

不过，单讲日本队阵容，艾尔觉得唔能够睇小。二十六人大军名单当中，有十九位系外流球员。南野拓实、久保建英、镰田大地有晒充足证明，今季踢紧白礼顿嘅三笘薰更系眼前一亮。呢位前川崎前锋球员踢闸位、中场同翼位都得，变速力相当强，射术亦唔错，可以话系今届日本队嘅X Factor！艾尔比较担心嘅系日本后防级数一般，门将川岛永嗣又走紧下坡，防綫上较为不足。

日本球员身体质素无欧洲队咁强，但个人技术同整体性唔弱，球员纪律性强，前綫球员又具备一定速度，都啱「一哥」嘅反击战术。今场预期日本会系比较被动嘅一方，但德国破密集嘅能力一般，未必踢得好轻松。今场艾尔推介日本让球「+1」下盘，9.5角球大亦可留意。 艾尔

立即下载 | 全新《星岛头条》APP : https://bit.ly/3yLrgYZ